Illuatungiliuttut aamma isorinnipput: Atorfilittamik Issittoq pillugu aallartitanngortitsisoqarnera uggornarpoq
Naalakkersuisut naalakkersuisunullu Inatsisartuni illuatungiliuttut kiisami isumaqatigiipput.
Tassa Danmarkip nunanut allanut ministereqarfiata danskimik atorfilittamik Issittoq pillugu aallartitanngortitsinera Naalakkersuisut isornartorsioreeraallu taamaattoqarpoq.
Demokraatit siulittaasuat, Jens-Frederik Nielsen, KNR-imut tamanna pillugu ima oqarpoq:
- Atorfilittamik Issittoq pillugu aallartitanngortitsisoqarnera taassumalu Issittumik ilisimasaqarluarnissaata pingaartinneqannginnera uggornarpoq.
Naalakkersuisut Issittumeersumik, tassa nunatsinneersumik, aallartitanngortitsinissamut piukkussaqarsimagaluartoq, Nunanut allanut tunngasuni, Inuussutissarsiornermut Niuernermullu Naalakkersuisoq Vivian Motzfeldt (S) oqarpoq. Danmarkilli nunanut allanut ministeria Lars Løkke Rasmussen (M) taamaaliornissamut itigartitsivoq.
Vivian Motzfeldt efter Løkke-afvisning: Vi må være klar på at finde vores egen ambassadør
Danmarkip nunanut allanut ministereqarfiata aallartitanngortitap inuiaassusia apeqqutaatinnagu suliamullu piginnaasaqarnera pingaartilluinnarlugu toqqaritsik, Lars Løkkep Danmarkimilu politikereqataata allat erseqqissaatigisareerpaat.
Toqqakkallumi inuiaassusia namminneq aamma apeqqutaatinngikkitsit, Demokraatit oqarput.
- Demokraatininngaanniit soqutiginngilarput, qallunaat aallartitanik nunarsuartinni nunani allani kikkut aallartinniarneraat. Taakku soqutiginngilagut. Uagutsinnut soqutaavoq, Issittumi aallartitassaq tassaassooq Issittumik ilisimasaqartoq, Jens-Frederik Nielsen KNR-imut oqarpoq.
Danmarkip naalakkersuisuisa nunatta kissaataa akuerisariaqaraat, taanna isumaqarpoq:
- Uggornartuuvoq Danmarkip nunanut allanut ministeria taamannak oqariartorsinnaammat. Ila piffissami suleqatigiilluarnerunissamik atorfissaqartitsivugut. Danmarkimi naalakkersuisoqatigiit maannakkut qinigaaffiit marlunngortuni oqariartorput, suleqatigiinneq pitsaanerusoq atorfissaqartikkipput. Nunatta aalajangiinerni peqataanerulernissaanut aqqutissiuussiniarlutik neriorsuisarnikuupput, taanna oqarpoq.
Naleraq: Aallartitaqaqatigiinnissamut tunngavissaqanngilaq
Danmarkip nunanut allanut ministereqarfia tallimassaanik Issittoq pillugu aallartitanngortitseqqammerpoq. Nalerarli Issittoq pillugu aallartitanngortitsisoqartarnera isornartorsiortareerpaa.
Naalagaaffeqatigiinnummi sinniisussamik Issittoq pillugu aallartitaqarnissamut tunngavissaqanngitsoq, Naleqqap siulittaasuaq Pele Broberg isumaqarpoq. Nunarpummi Danmark suleqatiginagu Issittoq pillugu nunami allami nammineq aallartitaqartariaqartoq, taanna isumaqarpoq.
Løkke afviser grønlandsk indflydelse på valg af ambassadør
- Issittormiuunatik sooruna Issittoq sinnerlugu oqalunniartuaannartut? Danmark EU-miippoq, taamaammat Danmark Naalakkersuisut nalimisut pillugit Issittumut sinniisuutilerniarai?, Pele Broberg KNR-imut oqarpoq.
