Inuit Ataqatigiit: Illuatungiliuttunit suleqataalluassaagut

Naak Inuit Ataqatigiit illuatungiliuttuugaluarlutik suliassat annerit soorlu aalisarnermut ilinniagaqarnermullu tunngasut pillugit suleqataaffigilluarnissaanut piareersimapput.
Inuit Ataqatigiinnut aaqqissuussisuni siulittaasup tullia Muté B. Egede KNR-imut taama oqarpoq. 

 Inuit Ataqatigiinninngaanniit illuatungiliuttuni sulinissami nipimik ersarissumik aammalu anguniagaqaqatigiinnermik suleqatigiinnissamillu tunngavilimmik suleqataajumaarpugut, ersarissuliortarnermik aamma naatsorsuutigineqassuugut, Muté B. Egede oqarpoq, ersarissuliornernerlu ima nassuiaaserpaa:

- Apeqqutit annertoorujussuit aggersut taakkua pinngitsuuinnatik siammasissumik tunuliaqutaqarlutik toqqammaveqartariaqarput, assersuutigalugu aalisarnermut inatsisissaq, meeqqat inuusuttullu atugaat ilinniartitaanermullu tunngasut eqqaaneqarsinnaapput aammalu amerlanerujussuarnik taaguisoqarsinnaavoq taakkua tamarmik toqqammavigissaartariaqarput siammasissumik.

AAMMA ATUARUK Illuatungiliuttut naalakkersuisoqatigiinnut sunniuteqarsinnaassapput

Suliassat annertunerit soorlu aalisarnermut meeqqanullu tunngasut Inatsisartunit tamanit taperserneqarnissaat pisariaqarpoq. Kim Kielsenip naalakkersuisooqatigiissitai illuatungiliuttut tusarnaarluarumaaraat, Muté B. Egedep neriuutigaa. 

- Tassanilu aamma neriuutigivarput naalakkersuisooqatigiilersut illuatunguliuttunut tusarnaarsinnaassuseqarlutik suleqatiginnikkusullutik ingerlatsiumaartut.

AAMMA ATUARUK Naalakkersuisut illuatungiliuttunit tatineqassasut