Illersornissamut nunanullu allanut tunngasut Naalagaaffeqatigiit Savalimmiuni ataatsimiinnerminni oqaluuseriniaraat

Sillimaniarnermut nunanullu allanut tunngasut naalagaaffeqatigiinni naalakkersuisunut siulittaasut Savalimmiuni sisamanngornermi ataatsimiinnerminni oqaluuserissavaat.
Danskit ministeriunerat, Mette Frederiksen, Savalimmiunut tikippoq. Naalagaaffeqatigiit sisamanngorpat ataatsimiissapput. Assi © : Scanpix
juunip 07-at 2022 13:48
Nutserisoq Hanne Petersen

Nunatta, Danmarkip Savalimmiullu naalagaaffeqatigiittut ukiumoortumik ataatsimiittussaanerat nutaarsiaanngilaq.

Perngaammilli Europami sorsuttoqarnerani ataatsimiissapput. 

Taamaammat nunani taakkunani naalakkersuisut siulittaasuisa sillimaniarnermut illersornissamullu tunngasut Savalimmiuni sisamanngorpat ataatsimiinnerminni pingaarnertut oqaluuserissavaat.

- Nunarsuarmi sillimaniarnermi pisut Issittumut aamma Atlantikup Avannaanut aamma sunniuteqarput. Danskit naalakkersuisuisa, Savalimmiut naalakkersuisuisa kalaallillu naalakkersuisuisa tamanna pingaarnerit ilaattut oqaluuseriniarpaat, danskit ministeriuneqarfiat ilisimatitsivoq.

Radariliilersaartut

Naalakkersuisut siulittaasuat, Múte B. Egede, Savalimmiut lagmandiat, Bárður á Steig Nielsen, danskillu ministeriunerat, Mete Frederiksen, naalagaaffeqatigiit ataatsimiinneranni peqataassapput.

Taakkua ataatsimiinnerminni sorpiaat oqaluuserissaneraat ilisimatitsissutigineqanngilaq.

Ministerilli allat aamma ataatsimeeqataassapput, taakkualu nunat allat, sillimaniarneq illersornissarlu pillugit attaveqarnermut ataatsimiititaliami, naalagaaffeqatigiit siorna ukiumoortumik ataatsimeereerneranni pilersitami,  ataatsimiinnermi aamma peqataassapput.

Danskit illersornissamut ministereqarfiat tusagassiutinut ima nalunaarpoq:

- Ukrainemi sorsunneq isumakulunnaqaaq, taamaammallu Europap avannarpasissuani nunat naalagaaffeqatigiit iluanni sillimaniarnermi suleqatigiilluartariaqarput. Iligisavullu suleqatigiinnerput nukittorsarniarlugu naapeqatigiinnissarput pingaaruteqarpoq, ataatsimooruttami nukittunerussaagut.

USA-llu nunatsinni radariliilersaarnera ataatsimiinnerminni aamma oqaluuseriniarunarpaat.

AAMMA ATUARUK Danmark USA-lu: Amerikamiut radarii Kalaallit Nunaanniittut amerlisinnaapput

USA nunatsinni radarileeqqilersaartoq taamaammallu illersornissaqarfia immikkut ilisimasalittaminnik sumi radariliisoqarsinneeranik misissuiartortitsisinnaalluni neqeroortoq, KNR sapaatit akunnerata siuliani nutaarsiivoq.

Naalakkersuisut tamanna pillugu suli oqaaseqanngillat, naalagaaffeqatigiilli USA-p radariliilersaarnera oqaloqatigiissutigisaraat danskit illersornissamut ministereqarfiata uppernarsarpaa.

Danskillu illersornissamut ministeriat, Morten Bødskov, Savalimmiullu nunanut allanut naalakkersuisuat, Jenis av Rana, Issittumi upalungaarsimaneq pillugu aamma ataatsimiissasut, danskit illersornissamut ministereqarfianit ilisimatitsissutigineqarpoq.

USA-p nunatsinni attaveqaasersuutinut taamatullu sakkutooqarnermut sakkutuujunngitsunullu aningaasaleerusunnini 2018-mi nalunaaruteqarnerata ilutigisaanik ataatsimeerratissapput.

Aamma nunanut allanut naalakkersuisoq, Vivian Motzfeldt, aamma aningaasaqarnermut naalakkersuisoq, Naaja H. Nathanielsen, taavalu Savalimmiut nunanut allanut naalakkersuisuat, Jenis av Rana, Savalimmiut aningaasaqarnermut naalakkersuisuat, Uni Rasmussen, danskit illersornissamut ministeriat, Morten Bødskov, kiisalu danskit nunanut allanut ministeriat, Jeppe Kofoed, ataatsimeeqatigiissapput.