Illersorneqarsinnaanngilaq

- Nunatta imartaani uuliamik akutissanillu mingutsitsisoqaraluarpat, mingutsitsinermik katersisinnaasunik upalungaarsimasoqannginnera illersorneqarsinnaanngilluinnarpoq. Inatsisartunut ilaasortaq demokraatineersoq Marie Fleischerimut attaveqarnermut, silaannaap pissussaanut avatangiisinullu naalakkersuisup, Kim Kielsen-ip, akissutaanut taama qisuariarpoq.
Allattoq Oline I. Olsen
januaarip 16-at 2008 13:00

-Illersorneqarsinnaanngilluinnarpoq. Ukiuni aggersuni umiarsuit takornariartaatit tikittartut amerligaluttuinnartut siunissamilu uuliasiornissamik ilimasunneq eqqarsaatigissagaanni tamakkua aaqqinneqartariaqarput, Marie Fleischer oqarpoq.

Imartaq sinerissamiit 3 sømilinik avammut Danmarkip akisussaafigaa. Kisianni Marie Fleischer isumaqarpoq, upalungaarsimanerup pitsaassusissaata minnerpaaffilernissaanut, Naalakkersuisut danskit naalakkersuisuinut piffissami qaninnerpaami piumasaqartariaqartut. Iliuusissanilli misissuisunik Naalakkersuisut ivertitsisimanerat inatsisartunut ilaasortap Demokratineersup maannangaaq iluarisimaarallarpaa.

- Kisianni misissuinerit inernerat naammaginngikkukku, soorunalimi iliuseqaqqikkumaarpunga, Marie Fleischer oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq