GUX-imi ilinniartut: Ilitsoqqussaralugu oqaatsivut ulloqartoq naluarput
Nunarsuaq tamakkerlugu Unescop ilitsoqqussaralugu oqaatsit ippassaq ullorititaraa.
Ulloq taanna ilaatigut nunatta atuagaateqarfiani tassunga tunngasunik aaqqiissussisoqarpoq.
Ullorlu taanna nunatsinnut qanoq pingaaruteqartiginersoq Oqaatsinik ilisimatusarfimmi pisortaq, Naja Blytmann Tronhjem nalilersortipparput. Nunatsinni ilitsoqqussaralugu oqaatsitta tammariartornissaannik ernumassutissaqanngitsugut, taanna KNR-imut ippasaq oqarpoq.
Nuummili GUX-imi ilinniartut, ilitsoqqussaralugu oqaatsit ulloqartoq naluaat, taakku ippassaq KNR-imiit naapippagut.
Magda–Maria Treur:
Ullumikkut ilitsoqqussaralugu oqaatsit ullorivaat, nalunngiliuk?
Isumaqarpunga tamanna ajunngitsuusoq, oqallisiginerusariaqaraluarparput. Uangami nammineerlunga naluara taamaattumik ulloqartoq. Nunatsinniittut kalaallisut oqaatsitsinnik eqqummaarinnerusariaqarsoraakka
Ilitsoqqussaralugu oqaatsit suunersut nalunngiligit?
Tassa meeraanitsinniit oqaatsit ilikkarsimasagut, oqaatsigut.
Illit oqaatsit sorliit ilitsoqqussaraagit?
- Hollandermiut oqaasii, kisianni maannga nuukkamali qallunaat oqaasiinut nuukkiartorpunga oqaatsillu taakku atorneruleraluttuinnarlugit.
Ivalu Berthelsen:
Ullumikkut ilitsoqqussaralugu oqaatsit ullorivaat, nalunngiliuk?
- Naa.
Qanoq isumaqarfigaajuk ilitsoqqussaralugu oqaatsit ulloqartinneqarnera?
- Aus´ ajorinngilara. Kisianni aatsaat paasivara taamaattumik ulloqartoq.
Oqaaseq ilitsoqqussaralugu oqaaseq qanoq isumaqarnersoq nalunngiliuk?
- Naamik.
Massakkut paasivat ilitsoqqussaralugu ulloqartoq, ulloq qanoq atussaviuk?
- Naluara, nalinginnaasumik atussavara.
Kalaallit oqaasii ilinnut qanoq pingaaruteqartigippa
- Soorunami pingaaruteqarput, kisianni ulluinnarni qallunaat oqaasiinut akulerullugit atortarpakka.
Sooruna kalaallit oqaasii qallunaallu oqaasii akulerullugit oqaluttartutit?
- Immaqa perussutigeriarakki.
Aia Lyberth Jeppson:
Ullumikkut ilitsoqqussaralugu oqaatsit ullorivaat, nalunngiliuk?
Aamma uanga aatsaat tusarpara suunersoq.
Qanoq isumaqarfigaajuk ilitsoqqussaralugu oqaatsit ulloqartinneqarnera?
- Kalaaliugama, Nuummiuugama kalaallisut oqaluttussaallunga isumaqarpunga, ilitsoqqussaralugit oqaaserigakkit. Ulluinnarni qallunaatut oqalunnerusarama kisianni kalaallit oqaasii ilitsoqqussaralugit oqaaserigakkit ullumikkut kalaallisut oqalunnerulaassaanga.
Siunissami ulloq tamanna malunnartittalissaviuk?
- Eqqaamagaangakku kalaallisut oqalunniartassaanga.
Ilitsoqqussaralugu oqaatsitit qanoq pingaaruteqartigippat ilinnut?
- Pingaaruteqaqaat. Ulluinnarni qallunaatut oqalunnerusarama kalaallisut oqaatsikka puigoriartorakkit, taamaammat atornerunissaa pingaaruteqarpoq, ilaquttakka aamma kalaallisut oqalunnerusaramik. Kisianni kammalaatikka qallunaatut oqalunnersaramik ilaannikkut nalunalaartarpoq kalaallisut oqalunnissaq.
