Ilisimatusarneq nutaaq Tunumi nannuttassanut amerlanerulersitsissasoq
Naqqiissuteqarneq 10.12.2025: KNR-ip Pinngortitaleriffimmit saaffiginnittoqarnerata kingorna ilanngutassiami oqaaseqatigiit misissorlugillu oqaaseqatigiit ataasiakkaat paatsuunganarsinnaasut aamma Pinngortitaleriffimmit nalunaarummik nassuiaatigineqarnerit kukkusut allatut oqaasertalersorpai.
- Tunumi ukiorpassuarni ilisimatusarnerup kingunerisaanik piujuartitsisumik nannuttassiissuteqarnissaq periarfissaalerpoq.
Pinngortitaleriffik tusagassiuutinut nalunaarummi allappoq.
Nannut qanoq amerlatigisut piujuartitsisumik piniarneqarsinnaanissaannut naliliinissaq ilisimatusarnerit paasissutissallu amigaataatillugit ajornakusoorsimavoq, Pinngortitaleriffik allappoq.
Maannali periarfissaalerpoq.
Pinngortitaleriffiummi nalunaarusiami East Greenland Polar Bear Subpopulation Harvest Risk Assessmentimi oktobarimi saqqummiunneqartumi Tunumi nannuttassiinissamut ilisimatuussutsikkut siunnersuinertik siulleq saqqummersippaa.
Nannut nalunaarsorneqartut
Ilisimatusarnermi suliniut Pinngortitaleriffimmit ilisimatusartut Ittoqqortoormiini Tasiilamilu nannut angalaffigisartagaannik silallu pissusiata allanngoriartornera pillugit piniartunik apersuinerannik 2014-imi aallartinneqartoq, Pinngortitaleriffiup ilisimatusarnermik suliniut taanna pillugu tusagassiuutinut nalunaarummi allami oqaatigaa.
Ilisimatusartut suliaqarnerup taassuma kingorna sumiiffimmi suliaqarnertik aallartippaat, tassa nannut 2015-ip 2022-llu akornanni nalunaarsorpaat.
Ilisimatusartut tassani nannut ipiutaasartaannik misissugassanik tigusisinnaallutillu sumi angalanerat aamma malinnaaffigisinnaasimagaat, taakku allapput.
Pinngortitaleriffik nannunik timmisartumit aatsaat taama kisitsiffiutigisumik 2023-mi suliaqarpoq. Sumiiffimmi piniartut qaammataasakkullu nalunaarsukkat kisitsinermi aamma atorneqarput. Ilisimatusartullu tunumi nanoqatigiiaat 2.364-it missaanniittut tassani inerniliissutigaat.
Pisassiissutinut piumasaqaatit
Nannut qanoq amerlatigisut piujuartitsisumik piniarneqarnissaannut nannut qanoq nakkutigineqartiginerat apeqqutaasoq, Pinngortitaleriffiup nalilerpaa.
- Annikitsuinnarmik nakkutilliisoqassappat ukiumut nannut 66-it piujuartitsisumik piniarneqarsinnaassasut nalilerneqarpoq, taakku allapput.
- Ilisimatuussutsikkut annertuumik nakkutilliisoqarneratigut pisassiissutigineqartut 83-inut amerlineqarsinnaapput. Nakkutilliisoqassanngikkuni pisassiissutit kingusinnerpaamik 2040-mi ukiumut 60-inut ikilineqartariaqarput, Pinngortitaleriffik tusagassiuutinut nalunaarummi allappoq.
Tunumi 2025-mi nannuttassiissutit 60-iupput.
