Ilisimasalik: Siumumi siulittaasunngorniuunneq pissaaneqarniuunninngorsinnaavoq
Siumup siulittaasunngorumallutik marluk sassareerput.
Marluk sassassanerlutik eqqarsaatersuutigaat. Aappaa maanna siulittaasuuvoq aappaalu siulittaasumut tullersortaalluni.
Siumullu Ilulissani ataatsimeersuartitsinissaanut suli qaammatit tallimaapput.
- Erik Jensenip novembarimili sassareernikuuvoq, taamaattumillu aamma unammillertissaanik sassartoqarluni, Ilisimatusarfimmi inuiaqatigiilerinermi adjukti Rasmus Leander Nielsen oqarpoq.
AAMMA ATUARUK Karl-Kristian Krusep Siumumi siulittaasunngorniarnissaq isumaliutigaa
Erik Jensenip Siumumi siulittaasutut qinigassanngortinnini novembarimi suaarutigaa.
Siulittaasunngorniunnermut sassarnissamut ilimanaateqarsinnaasut tassaapput, maanna partiip siulittsut Kim Kielsen taavalu partiip politikkikkut oqaaseqartartua Karl Kristian Kruse. Karl Kristian Krusep siulittaasutut sassarnialikkersaarnini eqqarsaatersuutigalugu siorna augustimi oqaatiginikuugaluarpaa. Kim Kielsenilli siulittaasunngorniunnermut sassaqataanissani eqqarsaatersuutigigaa paasinarsimmat Karl Kristian Kruse nalornilerpoq.
- Kim Kielsen sassaqqissappat Karl Kristian Kruse sassassanersoq qularnarpoq. Tamakkua tamarmik imminnut ataqatigiipput, aamma partiip iluani pisut eqqarsaatigalugit, Rasmus Leander Nielsen oqarpoq.
Siumumi siulittaasunngorumallutik sassartut arlaqalereerneri assigiinngitsunik peqquteqarpoq.
- Kim Kielsenip aqutseriaasia isorineqartorujussuunikuuvoq. Saqquminnginnera, inuiaqatigiillu isummersortorujussuit akornanni ersarissumik isummertannginnera tassani pineqarlutik. Kisianni Siumut parteerujussuuuvoq Kim Kielsenilu tusagassiuutini aamma nuimanera killeqarluni, Rasmus Leander Nielsen oqarpoq.
Siumumi siulittaasunngorumalluni sassartoq kingulleq tassaavoq Vivian Motzfeldt. Taanna januaarip 24-ani sassarpoq.
Pissaaneqarniunneq avaqqunneqarsinnaavoq
Siulittaasunngorniuttoqartillugu ataatsimeersuarnermi siulittaasussamut qinersilernermi piffissaq kingulleq atorlugu sassartoqartarnera aamma takornartaanngilaq. Piffissaq kingulleq sassartoqartarnera pissutissaqarluartoq aamma adjunkti oqarpoq.
- Pissaaneqarniunnermut akuliukkusunngikkaanni piffissap qanillilluinnarnerani sassartoqarsinnaavoq.
AAMMA ATUARUK Kruse: Kielsen Siumup siulittaasuattut sassaqqissaaq
Siulittaasunngorniunermili sassajaarneq aamma iluaqutissartaqarpoq. Politikkikkut suut sulissutigerusunnerlugit tusagassiuutitigut, inuillu nittartakkatigut naapittarfiini nittarsaannissaanut piffissaqarluartussaammat.
- Qinersisartut partiillu iluani sungiunniassammassuk. Soorlu Erik Jensen aasarli ilimanaateqarlereersoq siulittaasunngorniunnermi sassaqataassasoq. Tassa Kim Kielseni unammillernialersaaraa pasinarami, Rasmus Leander Nielsen oqarpoq.
