Politikki

Cannabisip Inatsisartuni oqaluuserineqarnera: Ilinniartut oqallittoqarnissaa kissaatigaat

Qaqortumi niuernermik ilinniarfimmi ilinniartut cannabisi inerteqqutaaginnassanersoq inerteqqutaajunnaassanersorluunniit oqaluuserineqartariaqarsoraat.

Allattoq Amalie Abel Ankersø

apriilip 20-at 2023 11:39

Inatsisartut cannabisip inatsisitigut akuerisaalernissaa pillugu oqallinneq upernaakkut ataatsimiinnermi aallartippaat.

Hashi akuerisaalissappat iluaqutaasussat ajoqutaasussallu qulaajarneqassasut oqaatigineqarpoq.

UPERNAAKKUT ATAATSIMIINNEQ AAMMA CANNABIS PILLUGU OQALLINNEQ

Inatsisartut upernaakkut ataatsimiinnermi pingasunngornermi maajip 19-iani ataatsimiissapput.

Immikkoortut marluk cannabisimut tunngapput.

Inatsisartunut ilaasortap, Kristian Jeremiassenip Inuit Ataqatigiinneersup upernaakkut ataatsimiinnissamut siunnersuutaa immikkoortut 70 ima oqaasertaqarpoq:

"Ikiaroornartup cannabisip inerteqqutaajunnaarsinneqarpat pitsaaqutai aammalu ajoqutai misissuiffigineqarnissaat siunertaralugu Naalakkersuisut nassuiaammik suliaqaqqullugit Inatsisartut aalajangiiffigisassaattut siunnersuut. Nassuiaat cannabisip qanoq inerteqqutaajunnaarsinneqarsinnaanera aammalu qanoq tuniniarsinnaaneranik imaqassaaq."

Inatsisartunut ilaasortap, Aqqalu C. Jerimiassenip Atassummeersup immikkoortoq 79 siunnersuutigaa:

"Pisortanit aqunneqartumik cannabisip inerteqqutaajunnaartinneqarneratigut hashimik eqqussuisarnerup, eqqusseriaraluarnermi toqusoqartarnerata, hashimik unioqqutitsilluni tuniniaasarnerup tigummiaqartarnerullu kiisalu aningaasanik Kalaallit Nunaannit annissuisarnerup akiorneqarsinnaanerat pillugu apeqquteqaat aallaavigalugu oqallinnissamik siunnersuut."

Paasissutissarsiffik: Upernaakkut Ataatsimiinneq 2023 - Oqaluuserisassat oqaluuserineqarfissaasalu ullui, Inatsisartut.

Allisiguk

KNR-ip ilinniartut pingasut oqallittoqarnissaanik tikilluaqqusisut oqaloqatigai.

Matilda Magdikalat taakku ilagaat. Taassuma iluaqutaasut ajoqutaasullu maanna qaqinneqarnerat pitsaasuusoraa.

- Iluaqutissartaqarami, napparsimasunut pisinnaarpianngitsunut iluaqutissartaqarami. Ajoqutissartaanik atuisut pinngitsuuisinnaajunnaarsinnaammata aamma, innarliisinnaalluni eqqaamasinnaanermut. Akerleralugulu akerlerinngilara. Paasilluaqqaarusuppara iluaqutaasinnaanersoq. Oqaluuserilluarneqarnissaa Kalaallit nunaanni, inerteqqutaajunnaassanersoq imaluunniit akerlinganik.

Aamma atuaruk Inatsisartut cannabis pillugu oqallinnerat: Innuttaasut taasitinneqassasut Naleqqap piumasaraa

Sammisaq oqallisigineqartariaqartoq Arnaaraq Hansen aamma isumaqarpoq.

- Aap ammasumik oqaluuserisariaqarpoq. Tassa paasissutissat suli ersarinnginnamik, soorlu nunatsinni susoqassava? Assersuutigalugu Danmarkimi paasissutissat nunani allaniluunniit paasissutissat ersarittorujussuugamik. Isumaqarpunga ammaanneqartariaqartoq nunatsinni. Soorlu Matildap oqarneratut napparsimasunut iluaqutaasinnaagami.

Karen Erna Benjaminsenip ilinniartoqatini taperserlugit oqaluuserineqartariaqartoq isumaqarpoq.

- Tamaasa ajorinngilakka, ammaanneqassanersoq matoqqatinneqaannassanersorluunniit. Hashimik eqqusseriartartut nunatsinnut, maanakkut oqaatigissagaanni amerlapput, taavalu toqusoqartarneranut atatillugu aamma nunanniippoq taamaannera. Ajunngitsumik atorneqassappat, nakorsaatitulluunnniit atussagaanni ajorinngilara ammaanneqassappat.

Toqusut eqqusseriartullu amerlisut

Nunatsinni hashimik anngiortumik eqqusseriaraluartut pingasut siorna toqupput.

Aamma atuaruk Pinerluttuliortarneq annikilliartorpoq – ikiaroornartulli pillugit inatsisinik unioqqutitsinerit ukiuni 20-ni aatsaat taama amerlatigisut

Kalaallit Nunaanni Politiit hashi 129,7 kiilu ukiup ingerlanerani arsaarinnissutigaat.

Tamanna 2021-mut sanilliullugu 33 procentimik qaffariarneruvoq.