VIDEO Ilinniartut ineqarfiini inuuneq pillugu piviusulersaarut nutaaq

Piviusulersaarummi 'Matup Tunuani'-mik taaguuteqartumi, ilinniartut arfinillit Sisimiuni ilinniartut ineqarfiini ilaquttatik ungasillugit inuunerat malittarineqarpoq.

Piviusulersaarut ilinniartut ilinniartut ineqarfiini inuunermut piareersarnerisigut ilinniakkaminnik taamaatitsiinnartartut ikilisinnissaannik siunertaqarpoq.

- Kalaallit Nunaanni ilinniagaqarnermi ilinniartut ineqarfiiniittarneq immikkut sammillugu piviusulersaarusiaavoq. Ilinniarnerummi imarisaa sammineqarnerusarpoq, nalunaaquttalli sisamap kingorna unnunnissaata tungaanut susoqartarnera aammalu angerlarsimaffik qimallugu ungasissuliarneq nammineertussanngornerlu sammineqarpallaarneq-ajorlutik, piviusulersaarusiornermi ingerlatsisoq, Rune Bundgaard, taama oqarpoq.

Sisimiuni GUX-mi rektori, Poul Jensen, ilisimatusarnermik paasissutissiinermillu suliniummik 'Matup Tunuani'-mik aallarniisuuvoq.

Sisimiuni ilinniartut arfinillit suliniummi malittarineqarlutik filmiliarineqarput.

Inuusuttut nutaamik inuuneqalernissaannut piareersaatitut suliarineqarpoq

Piviusulersaarut ilinnialerumaartussanut, aammali ilinniartitsisunut angajoqqaanullu, sammitinneqarpoq. Ilinniartunullu sungiusimanngisami nutaamik allaanerusumillu inuuleqalernissamut, ilaatigut artornarsinnaasumut, piareersaatitut atugassiaavoq.

- Ilinniagaqarnerup sunik piumasaqaatitaqarneranik aamma sammisaqarfivoq. Ilinnialernikkummi assigiinngitsorpassuartigut allanngortoqartarpoq. Inuusuttullumi tamanna malugisinnaalluartarpaat, angerlarsimaffitsimmi qimallugu ungasissuliarnerminni aamma eqqarsartaatsimikkut allanngoriartorneq atortaramikku, Rune Bundgaard taama oqarpoq.

’Matup Tunuani’ ilisimatusarnermik paasissutissiinermillu suliniutaavoq, Vidvinkelip, Sisimiuni GUX-ip Ilinniartitaanermullu naalakkersuisoqarfiup suleqatigiillutik suliarititaraat.

Filmi ilinniartunut siullerpaamik takutinneqassaaq Sisimiuni septembarip qaammataani kingornalu sinerissap sinnerani takutinneqarumaarluni.

Piviusulersaarummut qilanaartuut ataani isiginnaarneqarsinnaavoq:

MATUP TUNUANI TRAILER from Vidvinkel on Vimeo.