Ilinniartut inaanni tattoqisaattut

Nuummi Ilisimatusarfimmi 22-t inissaqartinneqanngitsut, KNR-imiit sapaatit akunnerisa siulianni oqaluttuaraarput.

Aasiannilu GUX-imi rektori maanna oqaluttuarpoq, ilaqutaminnik ilaqarlutit ilinniariartortut 14-it ineeqqani tattoqisaaffiusuni najugaqartittariaqaritik.

Aasiaat inersimasunik ukiunik marlunnik sivisutigisumik ilinniarnertuunngorniartitsisalermat, ilinniartut meerallit inissaqartinniarnerat ajornakusuulersimavoq. Tamannalu ilinniartunut ilaqutaasunullu toqqissisimannginnermik kinguneqartartoq, Avannaani Ilinniarnertuunngorniarfimmi rektori  taama oqarpoq.

- Illersoruminaatsumik inissittariaqartarpagut, Avannaanni ilinniarnertuunngorniarfimmi rektori Dorthie Siegstad taama oqarpoq.

Ilinniarnertuunngorniarfik inissianik 14-inik INI A/S-imit aamma attartorpoq.

Tattoqisaanneq aaqqiagiinnginnermik pilersitsisartoq

Ilinniartut 369-it aggustip aallaqqaataani aallartipput. Taakkunannga 247-it kollegiani ineqartinneqarput.

Ilinniartulli ilaqutallit inissaqartikkumallugit, GUX inissianik INI A/S-imit aamma attartorpoq.

- Maassakkut ineeqqani 14-ni najugaqarput, ilaqutariit ataatsimik marlunnilluunniit meerallit, taakkualu saniatigut ilaqutariit ataatsimik sinittarfilinnut inissinneqartariaqartarput.

Tattoqisaannerlumi aaqqiagiinnginnermik malitseqarsinnaasartoq ilinniarfiup pisortaa oqarpoq.

 -  Inersimasunut ilinniarnertuunngorniartoqartalermalli, ilaqutariinnermut, meeraqarnermut aappariinnermullu tunngasunik nalaanneqartalernikuupput, Dorthie Siegstad oqarpoq.

Ilinniartut inuusuttut kisimiittut aamma marlukkaarlutik ineqatigiiaattariaqartartut, rektori oqaluuttuarpoq.

 - Ilinnialersussat ilinnialernissaannik itigartitseqqusaannginnatta ineqatigiissittariaqartarpagut,  inissaqartinneqannginnerat pillugu itigartitsigaluarutta, taavalu taakkua naammagittaalliorunik ilinniarfimmit tiguneqartussaapput, rektor taama oqarpoq. 

Dorthie Siegstadip Kommune Qeqertaliup borgmesteria, Ane Hansen, ataatsimeeqatiserisimavaa. Ilinniartunut inissaqartitsiniarnermi suleqatigiinnissaq taakkua oqaloqatigiissutigissavaat

Ilinniartitaanermut naalakkersuisoq attaveqarfigaarput, oqaaseqartinnissaali suli iluatsinngilarput.