Ilinniarneq

Ingerlaqqiffiusumik ilinniartitaanerit: Ilinniakkaminnik naammassinnittut ikileriartut

Ingerlaqqiffiusumik ilinniakkaminnik naammassinnittut ikileriarsimasut, Naatsorsueqqissaartarfiup kisitsisaataasa takutippaat.
Toqqorsivimmit: Ingerlaqqiffiusumik ilinniakkaminnik naammassinnittartut siorna ikileriarput Assi © : Randi Vestergaard Evaldsen
Allattoq Ivik Kristiansen
juunip 01-at 2018 07:02

Ingerlaqqiffiusumik ilinniagaqartut 131-t ilinniakkaminnik siorna naammassinnipput. Tamanna 2016-imut naleqqiullugu 46-nik ikileriarneruvoq. Minnerunngitsumik peqqissaasunngorniarnermik naammassinnittoqannginnera tamatumunnga pissutaavoq.

Ingerlaqqiffiusunik ilinniarnerminnik naammassinnitut 46 procentii nunatta avatanni ilinniarput.

Ingerlaqqiffiusunik ilinniakkaminnik naammassinnittut ukiut aappassaat ikileriarput. 182-it 2015-imi naammassinnipput, 50-it inunnut isumaginnittutut naammassinerat amerlaqutaallutik.

Ingammik professionsbachelorinngorniarfinni ilinniartut amerlapput, kanditatinngorniarfiiillu ikinnerpaanik ilinniartoqarlutik.

Kandidatitulli ilinnikkaminnik naammassinnittut siunissami amerlinissaat neriuutigineqarsinnaavoq. Kandidatinngorniarfinnimi 27-t siorna aallartipput, taakkulu 2015-imi aallartittunit 15-iusunit marloriaatingajammik amerlanerupput.

Piffissami sivisunerusumut kisitsisit misissoraanni ingerlaqqiffiusumik ilinniarfinni naammassinnittut amerleriarujussuarsimasut takuneqarsinnaavoq. Nunatsinnili inuit 20-nik ukioqalereertut 40 procentiinnaat meeqqat atuarfiata saniatigut ilinniakkamik naammassisaqarsimapput.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk