VIDEO Ilaqutariillutik Inatsisartunut qinigassanngortittut
Qinersisoqassatillugu ilaqutariit qinigassanngortittarnerat takussaaleraluttuinnarpoq. Inatsisartunut qinigassanngortittuni ilaqutariit ataatsikkut qinigassanngortittut KNR-ip oqaloqatigai.
Ataatasoq erninilu, Qaqortuminngaanneersut, marluullutik Inatsisartunut qinigassanngortipput. Anguniakkamikkut aamma assigiinngissuteqarpallaanngillat.
- Atassummi maani immikkoortortaqarfimmi siulittaasunngorama ingerlaannaq soqutigisakka nammineq malersorlugit aallartikkamigit, Atassut tunuliaqutaralugu qinigassanngortittoq Henrik Ottosen oqarpoq.
- Soqutigisagut timersornermut tunngasuunerupput. Aamma K-33-mi sammisagut assigiissuteqartorujussuupput, ilaqutariinni timersornermik aallussisuugatta, Henrik Ottosen KNR-imut oqarpoq.
Aamma atuaruk IA, Siumut Atassullu Qaqortumi mittarfittaarusupput
Anguniagaqarnermilu aamma inuusuttuuneq, inersimasuuneq, utoqqaanerluunniit aamma apeqqutaasinnaapput.
- Ataatama anguniagai ukuunerupput soorlu timersornikkut aammalu nunalerinerup tungaatigut, inuussutissarsiornerullu tungaatigut anguniagaqarnerulluni. Taava uanga ilinniartitaaneq, inuusuttunullu tulluarnerusunik anguniagaqarlunga, Henrik Ottosenip ernera, Bentiaraq Ottosen, oqarpoq.
Demokraatillu tunuliaqutaralugit qinigassanngortittoq, Nivi Olsen, ataatanilu Siumumeersoq Bernhard Olsen, aamma qinigassanngortipput.
Aamma atuaruk Qineqqusaartut inuusuttut: Sulinermut akisussaaffeqarnerulerta
- Nuannequtigaa ilaqutariikkaluarluta isummagut assigiinnginneri saqqummiussinnaagatsigit kiffaanngissuseqarluta, Nivi Olsen oqarpoq.
Qineqqusaarnerlu aatsaat misilillugu pissanganarsimavoq, naak unamminartoqarsinnaasoq.
- Peqqutissaqarpianngitsumik partiilersuunnerujussuup suleqatigiinnissarput avissaartittaramiuk, taannartaa pikkunartarpoq. Aamma taanna ilikkagassaasoraara, inuttut qaangeriartorpara pissangasarnera, Nivi Olsen nassuiaavoq.