VIDEO IA, Siumut Atassullu Qaqortumi mittarfittaarusupput
- Soorunami Qaqortumi mittarfittaartariaqarpugut, Siumut tunuliaqutaralugu qinigassanngortittoq Pitsi Høegh oqarpoq, isumaqarporlu mittarfittaarnermi kujataani illoqarfiit annersaat ineriartortinneqassasoq.
- Inuit maannakkut aallagartut amerlanermik. Qimagussortut amerlanermik. Tassa taamaakkami nukipput tamaviisa atorlugit anguniartariaqarparput Qaqortumi mittarfittaarnissaq, KNR-imut oqarpoq.
Kelly Berthelsen Inuit Ataqatigiinneersoq isumaqarpoq, Qaqortoq ilinniartoqarfiummat pisariaqartitsineq annertusoq, maannalu helikoptereeqqanik angallassineq akitsoriartuinnarmat.
- Maani mittarfeqalerpat taakkua allanut atorneqarsinnaanngussaqaat. Siunissaq aamma sillimaffigalugu aningaasartuutaajuaannartut ukiut tamaasa aningaasartuutaajuaannartut qaangertariaqarparput, Kelly Berthelsen oqarpoq.
Angalaneq akisoqaaq
Bentiaraq Ottosen, 20-nik ukiulik, Campus Kujallermi ilinniartuuvoq, Atassullu tunuliaqutaralugu qinigassanngortippoq.
- Pingaartutut isigivara Qaqortumi mittarfittaartoqarnissaa, politikereq inuusuttoq oqarpoq, ilanngullugulu eqqaavaa Kangerlussuakkooqqaarluni Qaqortuliartarneq akisuallaartoq.
- Taavalu Narsarsualiaannarneq aamma akisoorujussuulluni, oqarpoq.
Taakku tamarmik isumaqarput mittarfiliorneq siunissamut aningaasaliinerusoq.
- Inuit atugarliutaat aallaaveqarpoq aningaasaateqannginnatta.
- Taava suliffeqarfeqalerpat kujataa, aatsitassarsiorneq mittarfeqarnermut aamma imminut attuumassuteqarluinnarami, tamakku ammakaassorutsigit inuit pilluaatsuunerat anisitaasarnerat, tamakku millissapput, Pitsi Høegh oqarpoq.
