Ilanngaaserisut assassaaleqisut: Nassaavut amerliartuaarusaarput

Namminersorlutik Oqartussat ilanngaaserisoqarfiat ikiaroornartumik katillugit 100 kiilunit oqimaannerulaartumik siorna nassaarpoq.

Ikioroornartut ilanngaaserisoqarfimmit nassaarineqartut amerliartortut ilanngaaserisoqarfimmi allaffimmi pisortaq oqarpoq.

- Tassa amerliartuaarusaarput. Ikiliartunngillat.

UvdloriánguaK Hansen taama oqarpoq. Taanna Namminersorlutik Oqartussat ilanngaaserisoqarfiani, nuna tamakkerlugu qulinik sulisoqartumi, pisortaavoq.

Imaattariaqanngilarli ikiaroornartoq anngiortumik eqqussuunneqartoq anneruleriartortoq.

- Uani immaqa peqqutaanerusarpoq, aamma uagut namminneerluta ilikkariartornerput, Uvdloriánguak Hansen oqarpoq.

Ikiaroornartup siorna nassaarineqartup ilarujussua 38,5 kiilu umiarsuarni pingasuinnarni nassaarineqarpoq.

Umiarsuarmimi ataatsimi arsaarinnissutigineqartoq 12 kiiluuvoq, allami 11 kiluulluni pingajuannilu 15,5 kiiluuluni.

Assassaaleqillutillu atortussameertut

Nunatsinni tamarmi ilanngaaserisut quliupput.

Taakkulu nunatta sineriassuani illoqarfinnut nunaqarfinnullu imaatigut timmisartukkullu tikittut tamaasa misissorsinnaannginnamikkit umiarsualiviit inuttunersiortariaqartarlugit misissuiffigisaraat pingaarnersiuisariaqartartullu, Ilanngaaserisoqarfimmi allaffimmi pisortap oqaatigaa.

- Nunarput anginermik taamaattumik ilai paasinarput tikittartut umiarsualiveqarfeqanngitsunut aamma siullermik appakaattartut.

Piffinni assigiinngitsuni Tusass suleqatigalugu misissuisarnerini, Ilanngaaserisoqarfik Kangerlussuarmi, Ilulissani Nuummilu immikkoortortaqarpoq.

Inoqarfinnullu umiarsualiveqanngitsunut tikittartut ikiaroornartunik nassataqarnersut misissornissaannik pisussaaffeqarnertik ilaatigut angujuminaatsittaraat, Uvdloriánguak Hansenip oqaatigaa.

- Pissuteqarpoq ataasiinnarmik. Tassa uagut angallateqannginnerput. Aamma suleqateqarsinnaagaluarpugut. Aamma suleqatissarsiortarpugut tassaavorlu politiit taavalu aamma imartani nakkutilliisut.

Taamaammat sinerissami umiarsuarni assigisaanilu ikiaroornartoqarnersoq sukumiinerusumik misissuiffigissagunikku sumik atorfissaqartitsinersut Ilanngaaserisoqarfimmi allaffimmi pisortap ima nassuiarpaa.

- 2018-imi Naalakkersuisut ataatsimik ilavaatigut, ilaqqinneqarsinnaanissaallu aamma eqqarsaatigineqarsinnaavoq, immaqa umiatsialiinikkut. Taanna eqqarsaatigineqarsinnaavoq, Uvdloriánguak Hansen oqarpoq. 

Politiit ikiaroornartoq pillugu unioqqutitsinernut atatillugu 584-inik siorna nalunaarsuipput – hashilu 129,68 kiilu arsaarinnissutigineqarluni.