Angut kokainimik erlumminiititaqarluni nunatsinnut anngiortumik eqqusseriaraluarsimasutut unnerluussaq pineqaatissinneqartoq

Kokainimik timiminiititaqarluni anngiortumik eqqusseriaraluartutut Kangerlussuarmi maajimi tigusaq, Jacob Morsing, ataasinngornermi eqqartuussaavoq. Angut taanna 37-nik ukioqarpoq.

Jacob Morsing kokainimik anngiortumik eqqusseriaraluartutut eqqartuussaalluni ukiuni sisamani pineqaatissinneqarpoq. Taanna tigusaagami kokainip saniatigut 7.500 koruunit arsaarinnissutaapput, aamma suliami uani aningaasartuutaasunik aamma akiliisussanngortitaavoq.

Kalaallit Nunaanni Politiit unnerluussisuat, Morten Grimm Hvergel, KNR-imut taama oqarpoq. 

Jacob Morsing Danmarkimiit nunatsinnut maajip ulluisa pingajuanni tikikkami tigusaavoq. Taanna kokainimik 157 grammimik erlumminiititaqarluni anngiortumik eqqusseriaraluartutut pasisaalluni taamanikkut tigusaavoq. Tassa kokainimik nunatsinnut anngiortumik eqquteriaraluakkani anginerpaat ilaannik nassaartoqarpoq.

- Nunatsinni tamassuma pisimanera eqqarsaatigissagaanni ilisimasatsinni qularnanngitsumik annersaat ilagaat - annersaagunarporluunniit, politikommissæri paasiniaaqqissaarnermut immikkoortortami aamma aqutsisuusoq Malik Sandgren KNR-imut eqqartuussivilersuinnginnermi oqarpoq.

Unnerluussisoq iluarisimaarinnittoq

Unnerluussamut pineqaatissiissutaasoq, Morten Grimm Hvergelip iluarisimaarpaa.

- Unnerluussatsinnut pineqaatissiissutaasoq eqqartuussivilersuinnginnermi kissaatigisatsinnut naapertuummat iluarisimaaqaara, taanna pineqaatissiinerup kingunitsiannguani oqarpoq. 

Aamma eqqartuussut eqqartuussaasup eqqartuussisuuneqarfimmut suliareqqitassanngortinnagu akueraa.

Suliaq una siunissami najoqqutaalissasoq

Suliaq una kokainimik aatsaat taama angitigisumik nunatsinnut anngiortumik eqqusseriarluarnermut tunngasuummat, eqqartuussut tunngaviliisuusutut unnerluussisup isigaa.

- Suliaq una kokainimik taama angitigisumik nunatsinnut anngiortumik eqqusseriaraluarnermi pineqaatissiisarnermi najoqqutaalerluni tunngaviliisuussaaq, taanna oqarpoq.

Ikiaroornartumik nunatsinnut anngiortumik siorna eqqusseriaraluarlutik toqusut pingasuupput.