Ullumikkut eqqartuussivimmi suliaq: Nunatsinni kokainini nassaarineqarnikuni immaqa annertunersaat angutip itiminut mangussimagai
Nuummi Sermersuup Eqqartuussisoqarfiani ullumikkut suliaq nassuernermit tunngaveqarluni ingerlanneqassaaq, suliami angut 37-nik ukiulik nunatsinnut 157 gramimik kokainimik itiminut mangussimasaminik eqqusseriarsimasutut unnerluutigineqarpoq.
Unnerluussut naapertorlugu Danmarkimiit nunatsinnut isernerminut atatillugu angut maajip pingajuanni Kangerlussuup Mittarfiani tigusarineqarpoq.
Kalaallit Nunaanni Politiini politikommissæri, Malik Sandgreen, paasiniaaqqissaarnermut immikkoortartami aamma aqutsisuusoq, KNR-imut ima oqarpoq:
- Nunatsinni tamassuma pisimanera eqqarsaatigissagaanni ilisimasatsinni qularnanngitsumik annersaat ilagaat - annersaagunarporluunniit.
Nunatsinni tuniniaqqinnissaa siunertaralugu eqqusseriarneq pisimasoq unnerluussumi nalilerneqarpoq.
Ikiaroornartumik iisilluni timimulluunniit manngussilluni eqqusseriarnerit amerlasut
Ukioq kingulleq ikiaroornartunik eqqusseriarnerit angutit pingasut inuunerannik annaasaqartitsisimapput.
Politiit oqarnerat naapertorlugu timertik atorlugu 2022-mi ikiaroornartunik eqqusseriarsimasut 62-it tigusarineqarsimapput. Kisitsisilli nammineq kisitaapput, taamaammat qularnarsinnaapput.
2021-mut sanilliullugu ukioq kingulleq nunatsinnut ikiaroornartumik eqqusseriarlutik tigusaasut pingasoriaammik amerlanerupput. Taakkunani amerlanerpaartaat hashimik eqqusseriarnerminni paasisaasimapput.
Naak ullumikkut eqqartuussineq nunatsinni aatsaat taama kokainimik annertutigisumik eqqusseriarsimanernut tunngassuteqaraluartoq, politiit paasinninnerat malillugu aanngajaarniutit sakkortuut, soorlu kokaini, ikiaroornartunut sulianut tunngatillugu amerliartunngillat.
- Men det er klart, at det er noget, vi er opmærksomme på, siger Malik Sandgreen. - Kisianni nalunanngitsumik tamanna eqqumaffiginiartussaassavarput, Malik Sandgreen oqarpoq.
Ikiaroornartunut attuumassutilinnik pinerluttuliortarnerit ukkatarineqartut
Kalaallit Nunaanni Politiit hashi 129,7 kiilu siorna arsaarinnissutigaat. Tamanna 2021-mut sanilliullugu 33 procentimik – tassa pingasoriaataanik annertuneruvoq.
Arsaarinnittarnerit amerleriarnerat nunatsinnut ikiaroornartunik eqqussisarnerit amerleriarsimanerannik imaluunniit politiit sunniuteqarluarnerannik peqquteqarnersoq qularnarpoq. Politiilli isumaqarput kingullertut taaneqartoq pissutaasoq.
- Ikiaroornartunut attuumassutilinnik pinerluttuliortarnerit nalinginnaasumik ukkatarinerusarpavut, tassani aqqusinermi pisunut kiisalu misissueqqissaarnerni annertunerusunut atatillugu suliniuteqartarpugut. Tamassuma saniatigut ilanngaasserisutut oqartussaasut peqatigalugit angalanerit pasinartut ileqqullu ilisarnartut eqqumaffiginiartarpavut, Malik Sandgreen oqarpoq.
Angutip 37-nik ukiullip eqqartuunneqarnissaa nalunaaqutaq 13 aallartissaaq. Angutip ukiuni sisamani piumasaqaatitaqanngitsumik pineqaatissinneqarsimasunut inissiisarfimmiittussanngortinneqarnissaa unnerluussisussaatitaasut piumasaraat.
