Politiit anngiortumik eqqussuineq navianartoq mianersoqqussutigigaat: Akilersinnaanngilaq

Nunatsinnut anngiortumik eqqussuineq inerteqqutaavoq. Taamaakkaluartorli eqqussuisoqartarpoq.

Ikiaroornartorli poortoriarlugu iillugu anngiortumik eqqussuineq sianiilliornerpaamik iliuuserineqartartut ilagigaat politiit oqarput. Taakku politiinit “bodypackere”-nik taaneqartarput.

Kalaallit Nunaanni Politiit taama eqqussuisut arlaqartut qaammatini kingullerni naammattoorpaat.

Taamaammat politiit “sianiitsumik” iliuuseqartarneq taanna politiit maanna mianersoqqussutigaat. Ikiaroornartup poortornera suli timimiinnermini putusooraangami tamanna toqqutigineqarsinnaavoq.

- Piffissami kingullerni pisuni arlalinni uku “bodypackere”-it iioraanermi kingornatigut peqqissutsimikkut ajornartorsiungaatsiartut naammattoorpagut, Kalaallit Nunaanni Politiit misissueqqissaarnermi aqutsisuat, Jan Lambertsen KNR-imut oqarpoq.

Taassuma decembarip kingornatigut inuit ikiaroornartumik anngiortumik iioraallutik eqqussusseriaraluartut nakorsamit pinasuartumik ikiortariaqartut arlaqartut nassuiaatigaa.

Ikiaroornartunik iioraaneq inuunermut uloriarnartoq

Jan Lambertsenip oqarnera naapertorlugu ikiaroornartumik poortukkamik iioraaneq ajornerpaamik pisaoqarnerani toqqutigineqarsinnaavoq.

Ikiartoornartup poortornerata putunera nakorsamit passunneqartariaqarnermik kinguneqarsinnaasoq oqarasuaatikkut oqaatigivat - tamanna itisilersinnaaviuk?

Ikiaroornartoq sorpiaanersoq apeqqutaasupiluussuuvoq, kisianni qanoq ikkaluarpalluunniit timimut ilaanngilaq. Arlaannut poortuuttarpaat, taava taassuma ingammik inalukkat ajoqusersinnaavai. 

– Ajornerusumillu – puua putuppat, taava toqunartuulluni timimut akuliutissaaq.

Tamanna toqussutaasinnaava?

- Toqussutigineqarsinnaavoq, Lan Lambertsen oqarpoq.

Pasisaqarnermi politiinut oqaatiginnittoqassasoq

Iioraasimasunik pasisaqarnermi qanoq iliortoqassava?

- Qaniginerpaasarigukkit oqaloqatigikkit. Ikiartoornartunik anngiortumik eqqussuineq nalinginnaasumik soorunami inerteqqutaavoq, iioraanikkulli eqqussuineq sianiilliorneruvoq, taamaaliornermi inuunermik navianartorsiortitsineruvoq, eqqarsarluartoqassaarlu.

- Tamanna nuanninngilaq, akilersinnaananilu,  Jan Lambertsen oqarpoq.

Kalaallit Nunaanni Politiit oqarasuaammut 701448-mut sianerfigalugit sunik tamanik ilisimatissinnaavatigut, imaluunniit nittartagaq hjemmeside politi.gl aqqutigalugu allaffigisinnaallugit.