Ilisimatusartut: Ilagiit isumaginninnikkut akisussaaqataanerusariaqarput

Aviisi Kristeligt Dagblad taama allaaserisaqarpoq.

Nunarpassuarni ilagiit inuiaqatigiinni inunnik inooqataanikkut ajornartorsiuteqartunik ikiuiniarnermi annertuumik suliaqartarput. Nunatsinnili pingaartumik naalagiarneq inuppassuarnut pingaartinneqartilluni katersuuffiusarpoq.

Ilagiilli naalagiartitsinerup saniatigut allanik suliaqarnerusinnaagaluarput, Ilisimatusarfimmi teologiimut immikkoortortaqarfimmi aqutsisoq, dr. theol. Aage Rydstrøm-Poulsen, aviisimut taama oqarpoq.

AAMMA ATUARUK Lutherip tunngavilersorlugit isummiussai 2017-imi ukiunik 500-nngortorsiutigineqarput

- Aperisoqarsinnaavoq sooq ilagiit utoqqarnut piartortut ineqarfissaannik, meeqqanut unnuaannakkut aneertartut paaqqinnittarfinnik pilersitsisimannginnersut, imaluunniit hashimik atornerluisorpassuarnut sooq suliniuteqannginnersut. Ilagiit ajornartorsiuterpassuarnut tunngatillugu iliuuseqarsinnaagaluarput, aamma isumaginninnikkut suliaqarnermut  aningaasanik immaqa katersiniarsinnaagaluarput.

Nunatsinni biskoppip, Sofia Petersenip, tamanna isumaqataaffigaa.

AAMMA ATUARUK Ilagiit sinniisaasa amigaataanerat inatsimmik allanngortitsisariaqartitsilersoq

Nunatsinni ilagiit suliniutinut isumaginninnikkut siunertaqartunut ukiuni kingullerni tallimani ukiumut 400.000 koruunik immikkoortissimavaat. Aningaasalli atorneqarneq-ajorput, ilageeqarfiit aningaasanik qinnuteqarneq-ajormata.

- Nunatsinni piitsuussuseq ersarippoq, aamma piitsut pisuullu assigiinngissutaat annertusiartuinnarpoq. Ilagiit isumaginninnikkut suliaqarnermut annertunerusumik peqataanissaat kissaatiginarpoq, biskoppitulli tamatumunnga kaammattuuteqaannarsinnaavunga, suliassaavoq naqqanit aallartisarneqartussaq, biskoppi taama oqarpoq.