Ilaasussat tusaaneqanngittutut misigisut
![](/sites/default/files/styles/image_934x467/public/user_pictures/OstermannKarlNuuk__tasiilaq-havn.jpg?itok=tT3Bb4TK)
Air Greenlandillu kingoraartissat silarlunnikuunera peqqutigalu assartornaveeqqavai.
Ilaasussanullu Air Greenlandip paasissutissiilluannginnera maannakkut isernartorsiorneqarpoq.
Qanoq sivisutigisumik Nunatta kangiani illoqarfimmiissanerlutik ilaasussat arlaqartut paasitinneqarsimanngillat.
Tasiilamiillu aallarneq ajuleqqasorpassuarnut Marie Pedersen ilaavoq.
- Paasissutissiineq annikippallaartutut, uanga nalilerpara, Marie Pedersen oqarpoq.
- Tallimanngormat uanga paasiniaavunga, paasisakka assigiinngippallaaqimmata, tassa tassani oqarfigineqarpunga ilumoortoq motooria ajortissimasoq, taavalu mekanikerit utaqqineqartut, kisianni itinerusumik paasisitsisinnaarpasinngillat, oqarfigineqaannarlunga ataasinngorpat tusagaqaqqikkumaarputit, Marie Pedersen nassuiaavoq.
Aamma atuaruk Nunatta Kangiani timmisartuussinerit unittooqqasut
Qanoq sivisutigisumik aallarnaveeqqassanerluni nalullugu nukillalaarnartorujussuusoq, Mariep oqaluttuaraa:
- Nukillalaarnartorujussuugami, paasissutissiijumagunik paasissutissiilissapput ullut qassit qaangiuppata paasisaqaqqikkumaarputit taannartaa nukillalaarnartorujussuuvoq, Marie Pedersen oqarpoq.
Qaqugu aallassanerluni ilisimanagu Tom Pettersonip aamma qatsuppaa.
- Iluassaqaarmi qanoq pilersaaruteqarnersut ilisimassallugit, nalunngilarpummi motori maanngaanneqartussaq Kulusummiittoq, Tom Petterson oqarpoq.
Allallu peqatigalugit sivisuumik Tasiilamiissinnaanissartik Tomip ernummatigaa.
- Air Greenlandimi qanoq pilersaaruteqarnersoq ilisimassallugu iluassaqaaq, ataasinngornermut pilersaarutaava? Imaluunniit sisamanngorpat piareersimanissartik pilersaarutigaat? Maannakkummi takusinnaasatsitut piffissaq asuliinnaq atorneqarpoq, tusagaqarnermi ajorpugut.
Sms atorlugu paasissutissanik ilaasussanut Air Greenland kalerriisarpoq.
- Timmisartuussinissamilli nutaamik pilersaaruteqanngikkaangatta kalerriineq ajorpugut, Mittarfeqarfinnulli paasissutissiisarpugut, taakkulu ilaasussat nalunaarfigisarpaat, Air Greenlandimi sulisoqarnermut pisortaq Mads B. Christensen, KNR-mut oqarpoq.