Nunatta Kangiani timmisartuussinerit unittooqqasut

Air Greenlandip qulimiguuliutaata Bell-212-ip teknikkikkut ajoquteqarnera peqqutigalugu Tasiilamiit nunaqarfinniillu ilaasussat 100-t missaaniittut aallarneq ajuleqqapput. Taamatullu aamma kingoraartissat silarlunnera peqqutigalugu tikiunneq ajulerneqarlutik.
Allattoq Malik Brøns
marsip 22-at 2016 08:45

Qulimiguulik Bell-212 pingasunngormat marsip 16-ianili ajortissimavoq. Qulimiguuliullu motoria aserorsimammat, Air Greenlandip kingoraartissat Tasiilamut assartorniarsarai. Qulimiguuliup ajoquteqarnera paasineqarmat akunnerit arlaqanngitsut qaangiuttut kingoraartissat Kulusuup mittarfianut tikiunneqarput, silalli ajorneranik kingoraartissat Tasiilamut assartorniarnerat ajornarsimasoq, Air Greenlandip sulisoqarnermut pisortaata Mads B. Christensenip oqaatigaa.

Suliffeqarfik qulimiguulimmik Narsarsuarmiit aallartitsisimagaluarpoq, silalli ajornera peqqutigalugu qulimiguulik uteqqiinnartariaqarsimavoq. Timmisartuararlu sikumut imarmullu missinnaasoq Twin-Otter Islandimeersoq suliamut ilanngunneqarsimagaluarpoq, silarlunnerali peqqutigalugu timmisartuaraq Kulusummut missinnaasimanngilaq.

Naggataatigullu Air Greenlandip kingoraartissat umiarsuarmik ingerlanniarsimagaluarpai, timmisartuutileqatigiiffilli umiarsuarnik inunnik nassiussassanillu Kulusuup Tasiilallu akornanni assartuisinnaasunik angallassinermut akuerineqarsimasumik nassaarsinnaasimanani.

Illoqarfiullu qulimiguuliutaanut kingoraartissat ingerlannissaanut silap iluarsinissaa utaqqiinnarneqalersoq Mads B. Chrisensen oqarpoq.

Siusinnerpaamik pingasunngornermi aallartoqarsinnaalissasoq, Tasiilami qulimiguulinnut mittarfiup nalunaarutigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq