Orsussat akikillinissaat ilimananngikkallartoq

Niuernermut Naalakkersuisup Vittus Qujaukitsup Inatsisartuni ilaasortap Hans Enoksenip Naleqqameersup § 37 najoqqutaralugu apeqqutaanut akissutaani tamanna atuarneqarsinnaavoq.

Polaroilip ikummatissat akii kingullermik siorna decembarip aallaqqaataanni akikillimmagit, Vittus Qujaukitsup innersuussutigaa.

Ikummatissat assigiinngitsut tamarmik taamani literimut 24 ørenik akikillineqarput.

Vittus Qujaukitsup oqaatigaa, Polaroilip ikummatissanik pisiniaqqinnissaa, ukiormanna apriilimi pisussatut naatsorsuutigineqarmat, aatsaallu tamanna pereerpat akinik appaasoqarsinnaanera aalajangiiffigineqarsinnaassasoq.

Ikummatissat akikillineqarnerisa kingunerinik soorlu aalisarnermi piniarnermilu atortut, nioqqutissallu allat akitsornerinik kinguneqassanersut Hans Enoksenip ilanngullugu paaserusuppaa.

Vittus Qujaukitsulli erseqqissarpaa, uuliap akiisa aalajangersarneqartarnerat nioqqutissanut allanut KNI-mi nioqqutigineqartartunut attuumassuteqanngimmat.

- Namminersorlutik Oqartussat aamma KNI-p akornanni kiffartuussinissamut isumaqatigiissutaat naapertorlugu, KNI-p iluani immikkoortortat assigiinngitsut akornanni ikiorsiisoqartarnissaanik isumaqatigissuteqanngilaq, Vittus Qujaukitsoq akissummini taama allappoq.