Politiit ullormut nalunaarusiaat: Ikuallattoqarnera tillinniartoqarneralu ulapputigaavut

Angut 25-nik ukiulik Nuummi suliffeqarfiit ilaannut Nuuk Transportimut tillinniartutut pasisaalluni tigusaavoq. 

Nuuk Transportip kalerrisaarutaa appissimasoq unnuaq ataasinngunngitsiartoq nalunaarfigineqarlutik, Kalaallit Nunaanni Politiit pigaartuisa pisortaat Ole Hald KNR-imut ilisimatitsivoq.

Igalaakkut iserluni tillinniartoqarsimasoq, politiit Nuuk Transportimut ornigutilertorlutik apuukkamik paasilertorpaat.

Ilisimannittoqarmat tigusaasoq

Politiit angut 25-nik ukiulik tillinniartutut pasillugu kingorna tigusaraat. Tillinniartoqarneranik ilisimannittup oqaloqatigereernerani taamaaliorput. Angut taanna tigummigallarneqareerluni iperagaavoq pisumullu pasineqarluni. 

Nuummi Nuukullammi majuartarfeqarfiit ilaanni ikuallattoqartoq, ullaaq tallimanut qiteqqutilertoq nalunaarutigineqarpoq. Ikuallattoqartoq malugilertorneqarmat qujanartumik ajoqusertoqanngitsoq, Ole Hald oqarpoq. 

Ikuallattoqarneranik politiinut nalunaartoq putsumik najuussuisimanersoq misissorneqarpoq.