Pituffik: Sakkutooqarfimmut timmisartuussineq USA-p suliariumannittussarsiukkaa

Pituffiup, Kangerlussuup Københavnillu akornanni timmisartuussineq, USA-p Illersornissamut qullersaqarfiata ataani assartuussinermut ataatsimiititaliarsuup, United States Transportation Commandimik taaguuteqartup, suliariumannittussarsiuuppaa.

Amerikami naalagaaffiup suliariumannittussarsiuussinermut nittartagaani FedBizOpps.gov-imi tamanna atuarneqarsinnaavoq.

Suliassaq sulisunik nassiussanillu sumiiffiit pingasuusut akornanni timmisartuussinissamik ingerlaavartumillu nukingernartunik timmisartuussisarnissamik imaqarpoq.

AAMMA ATUARUK Pituffik pillugu isumaqatiginninniarnermi piviusorsiunngitsumik piumasaqanngilagut

Air Greenlandip amerikamiut sakkutooqarfiannik timmisartuussineq 2003-miilli ingerlappaa, suliassamullu neqerooqqinnissaq eqqarsaataasoq, timmisartuutileqatigiiffik KNR-imut ilisimatitsivoq. Unammillerneqarnissarlu naatsorsuutigineqarpoq.

- Suliariumannittussarsiuussinerit siuliini allat aamma neqeroorput, aamma matumani taamaattoqarnissaa naatsorsuutigineqarsinnaavoq, Air Greenland mailikkut KNR-imut taama ilisimatitsivoq.

Tamanut ammasumik suliariumannittussarsiuussineq piumasaqaatitalik

Suliariumannittussarsiuussineq tunngaviatigut ingerlatseqatigiiffinnut soqutiginnittunut tamanut ammasoq, USA-p Danmarkimi aallartitaqarfiata KNR-imut ilisimatitsissutigaa. Suliarimannittussarsiuussinermili ingerlatseqatigiiffinnut neqeroorniartunut piumasaqaatit arlallit allattorneqarsimapput.  

Ilaatigut piumasaqaatigineqarpoq ingerlatseqatigiiffik Københavnip Pituffiullu akornanni timmisartuussinermi sapaatit akunneri sisamakkuutaarlugit ikinnerpaamik ilaasunik 150-inik usinillu 25.000 tonsinik assartuisinnaassasoq, kiisalu aamma qeritsivimmik utaqqiisaasumik atugassaqartitsisinnaassasoq.

AAMMA ATUARUK Pituffimmut tunngatillugu aaqqissuussinerit USA-p akueriumanngisai

Isumaqatigiissutip ingerlatseqatigiiffimmut ataasinnarmut tunniunneqarnissaa, Københavnimiillu Pituffimmut timmisartuussisarnerup ingerlaarfinnut allanut nuunneqarsinnaannginnera amerikamiut oqartussaasuisa aamma erseqqissaatigaat.

Aki assingusumillu suliaqarsimanermik misilittagaqarneq tunngavigalugit suliariumannittussarsiuussinermi ajugaatitsisoqassaaq. Ajugaasorlu ukiumut ataatsimut atuuttussamik isumaqatigiissuteqarfigineqassaaq, ukioq manna oktobarip aallaqqaataanit 2019-imi septembarip 31-ata tungaanut, isumaqatigiissutillu ukiumik ataatsimik sivitsorneqarnissaa periarfissaassaaq, tamannalu sisamariarluni pisinnaassalluni.

Tamatuma saniatigut isumaqatigiissuteqarnissamut allamik aamma periarfissaqarpoq, tassalu qaammatini 66-ini atuuttussaq, 2024-mi marsip 30-ata tungaanut, suliariumannittussarsiuussinermi atortussani taama allassimasoqarpoq.

USA: Illersornissaq pillugu kunngeqarfimmut isumaqatigiissut suliarimannittussarsiuussinermi malinneqarpoq

Pituffimmut tunngatillugu ukiuni kingullerni suliariumannittussarsiuussisoqartarnera Nunatta, Danmarkip USA-llu akornanni politikkikkut annertuupilussuarmik assortuussutaasarpoq, pingaartumik ilaatigut namminersorlutik oqartussanit piginneqataaffigineqartup Greenland Contractors I/S-ip Pituffimmi kiffartuussinissamik isumaqatigiissummik 2014-imi annaasaqarnerata kingorna.

Taamani suliariumannittussarsiuussineq kunngeqarfiup Danmarkip USA-llu akornanni illersornissaq pillugu isumaqatigiissummi sinaakkutissat iluanni ingerlanneqarpoq, isumaqatigiissummilu ilaatigut piumasaqaatigineqarpoq Pituffimmi kiffartuussinissamik isumaqatigiissut ingerlatseqatigiiffimmut naalagaaffeqatigiinni nalunaarsorneqarsimasumut tunniunneqassasoq.

AAMMA ATUARUK Kiffartuussinissamik isumaqatigiissuteqannginneq RAL-imi qissatigineqanngitsoq

Ingerlatseqatigiiffik Exelis Services A/S - ullumikkut Vetrus Services A/S-imik taaguuteqartoq - amerikamiullu ingerlatseqatigiiffiannit Vetrusimit pigineqartoq, Danmarkimilu ingerlatseqatigiiffittut nalunaarsorneqartoq, USA-p ajugaasutut 2014-imi suaarutigaa.

Ukiullu pingasut qaangiummata, 2017-imi upernaakkut, Royal Arctic Linep Pituffiup, Nuup Aalborgillu akornanni imaatigut assartuussinissamik isumaqatigiissut amerikamiut ingerlatseqatigiiffiannut Schuyler Line Navigation Co.-mut annaavaa.

USA-p Københavnimi aallartitaqarfia naapertorlugu, timmisartuussinissamut suliarimannittussarsiuussineq maanna ingerlanneqartoq Illersornissaq pillugu isumaqatigiissummi sinaakkutissat iluanni ingerlanneqarpoq.

AAMMA ATUARUK Kalaallit Nunaat Pituffik pillugu nutaamik isumaqatigiissusiortariaqarpoq

- Suliariumannittussarsiuussinermi (…) Fly CRAF akti aamma Kunngeqarfiup Danmarkip USA-llu akornanni Illersornissaq pillugu isumaqatigiissut malinneqarpoq. Suliariumannittussarsiuussineq suli ingerlavoq naammassitinnagulu killiffia sukumiinerusumik paasisissutissiissutigineqarsinnaanngilaq, amerikamiut Danmarkimi aallartitaqarfiat mailikkut KNR-imut taama allappoq.

Suliariumannittussarsiuussinermi ajugaasoq ukioq manna aggustip pingajuani nalunaarutigineqassaaq.