Suka: Pituffik pillugu isumaqatiginninniarnermi piviusorsiunngitsumik piumasaqanngilagut

Illersornissaqarfiup Danmarkimi ilisimatusarfiani lektorip Issittoq pillugu ilisimasallip Jon Rahbek-Klemmensenip sapaatip akunnerata siuliani Naalagaaffeqatigiit isornartorsiorpai siunissami Pituffimmi sullissinissamut isumaqatigiinniarnerni tunngavigisaat pillugit.

Taamali isornartorsiuineq Nunanut allanut tunngasunut namminiilivinnissamullu naalakkersuisup Suka K. Fredriksenip sisamanngornermi akerlilerpaa.

- Kalaallit Nunaata piumasaqaatai piviorsorsiorlutillu soqutigittartuupput. Suliat Inatsisartut aalajagigaat aallaavigalugit ingerlanneqarput, siunertaavorlu, isumaqatigiissutip sapinngisamik annertuumik  Kalaallit Nunaannut iluaqusiinissaa, Suka K. Fredriksen oqarpoq.

Sapaatip akunnerata siuliani Naalagaaffeqatigiit USA-mut isumaqatigiinniarnerminni siunnersuutigisimasai KNR-ip oqaluttuarai, tassani qulakkeerniarneqarpoq Kalaallit Nunaata aningaasatigut sapinngisamik annertunerusumik Kalaallit Nunaata Avannaani amerikamiut sakkutooqarfiannit pissarsinissaa.

AAMMA ATUARUK Danmarki piviusorsiortuunngitsunik piumasaqaateqarsimavoq

Suka K. Fredriksenip nassuerutigaa isumaqatigiinniarnerni unammillernartoqarsimasoq, erseqqissaatigaluguli illuatungeriit suli pitsaasumik attaveqatigiittut.

- Isumaqatigiinniarnerit suli ingerlapput, oqarsinnaavugullu ingerlalluartut, oqaloqatigiittarnitsinnimi periafissarsiortuarpugut. Taamaattumik matut ammapput, uagullu suli isumalluarpugut, naalakkersuisoq oqarpoq.

Taassuma ilanngullugu oqaatigaa, neriuutigigini isumaqatigiinniarnerit Inatsisartunut qinersisoqartinnagu naammassineqarumaartut.

AAMMA ATUARUK Isertuussissalluta isumaqatigiippugut

AAMMA ATUARUK Pituffimmut tunngatillugu aaqqissuussinerit USA-p akueriumanngisai