PITUFFIK Danmarki piviusorsiortuunngitsunik piumasaqaateqarsimavoq
Tallimanngormat KNR-ip oqaluttuarivaa, Kalaallit Nunaat Danmarkilu april-imi 2015-imili kiffartuussinissamik isumaqatigiissuutissatut siunnersuutinik assigiinngitsunik marlunnik USA-mut saqqummiussisarsimasut. Isumaqatigiissutit taakku tamarmik imarivaat, Namminersorlutik Oqartussat, Pituffimmi sakkutuujunngitsunut kiffartuussinissamut ingerlatsiviusussap pingasoraarterutaanik piginneqataassasoq.
Siunnersuutilli taakku marluk USA-p itigartippai.
- Aaqqissuussinerit uku, Danmarkip Kalaallillu Nunaata siunnertuutigisaat – Washington-imiit pissutsinik ajorseriarnertut isigineqarput, aaqqissuussinermut nutaanngitsumut naleqqiullugit. Taamatut KNR-imut oqaaseqarpoq Lektor, Issittuni immikkut ilisimasalik, Forsvarsakademimi København-imi atorfilik, John Rahbek-Clemmensen.
AAMMA ATUARUK Pituffimmut tunngatillugu aaqqissuussinerit USA-p akueriumanngisai
USA-p sakkutooqarfianut sipaarutiqanngilaq.
Malittarisassani maannamut atuuttuni, piumasaqaataasimavoq kiffiartuussinissamut isumaqatigiissut, kalaallinik imaluunniit qallunaanik pigineqartumik ingerlatsivimmut tunniunneqartassasoq. Ukiorpassuarnilu isumaqatigiissut Greenland Contractors-imut tunniunneqartarsimavoq, taannalu Namminersorlutik Oqartussanik piginneqataaffigineqarluni.
Greenland Contractors Pituffimmi sullissisussatut toqqagaasarsimanera pissutaalluni, ukiuni qulikkaani arlallinni Nunatta Aningaasaateqarfianut 200 mio.kr.-it isertitsissutaasarsimavoq.
Amerika-p sakkutooqarfia ukiuni kingullerni aningaasartuutinik sipaaruteqarniarsarinikuuvoq. Kalaallilli Nunaat pinngitsoorani piginneqataatillugu, USA aningaasartuutiminik sipaaruteqarnissaa ajornakusuussaaq, taamatut isumaqarpoq John Rahbek-Clemmensen.
- Taamatut suliarinnittussarsiuussinermik piumasaqaateqaraanni, ingerlatsiviit assigiinngitsut kiffartuussinissamut isumaqatigiissutissamut ingerlatserusunnissaanut pilerinannginnerulersarpoq. Taamaasillunilu aamma suliarinnittussatut neqeroorutit akikinnerpaat pinngitsoorsinnaallugit.
- Taamaammat paasinarluinnarpoq USA-p siunnersuutit itigartissamammagit, isumaqapoq.
AAMMA ATUARUK Ministereqarfik USA-mut isumaqatigiinniarnerni paamaarussisimaneraraat
Aamma tikkuarpaa Nunanut allanut Ministereqarfik Namminersorlutillu Oqartussat 2013-imi eqqumaffigisimanngikkaat, taamani aaliangiinissamut tunngavissat pisortat akuerimmasigit, amerikkarmiut ingerlatsivia Exelis Services, ullumikkut Pituffimmi kiffartuussinermik ingerlatsisut, suliarinnittussarsiuussinermi peqataasinnaatillugit akuerineqarsinnaasimammata.
- Maannalu Kalaallit Nunaat Danmark-ilu aaqqiissutissatut siunnersuuteqarput, Amerikkarmiunut ajornerusunik inissiisussanik, naak København-i Nuullu kukkuluttortuusimagaluartut.
AAMMA ATUARUK Pituffik pillugu suli oqaloqatigiittoqarpoq