Samuelsen: Pituffik pillugu suli oqaloqatigiittoqarpoq

Oqaatigerusunngilaali ilumut isumaqatigiinniartoqarnersoq.

Nunanut allanut tunngasunut ministeriusimasup Martin Lidegaardip ukiut marluk qaangiupput nalunaarutigimmaguli Danmark Kalaallit Nunaallu Pituffimmi sullissinissamik isumaqatigiissummi siunissami periarfissat pillugit USA-mik isumaqatigiinniartoqarniartoq.

Tamatumali kingorna nutaarsiassaqaqqissimanngilaq.

KNR-imit apersorneqartilluni ministerip Anders Samuelsenip aalajangiusimavaa suliaq pillugu USA oqaloqatigineqartoq.

"Isumaqatigiinniarpisi?" aperaarput.

- Attaveqarfigiillattaavugut. Taamaassaarmi. Aaqqiissutissanik siunissamut isigisumik ujarlerpugut. Mikisualuilli eqqaarusunngilakka, taamaalioraluarumami angusassat pitsaasut qatangiinnartissinnaavakka.

Isumaqatigiinniarnerimmi kingulliit qanga pippat?

Oqaatigerusunngilara.

Ministeriunerpit nalaani ?

- Suka ataatsimeeqatigisimavara aamma Vittus, taava apeqqutit tamakku soorunami eqqartortarpavut.

USA-mut  isumaqatigiinniarpisi?

- USA attaveqarfigisarparput. Soorunami nutaamik aqutsisortaarsimammata ajornakusoorninngulaarpoq. Tassa taamaakkami. Allanngortiterinernut piffissaq atorneqarsimavoq, amerikamiut aqqissuussaanerat taamaakkami. Sulissutigaarpulli.

Kisiannimi..

- Naamik oqaaseqaqqinnavianngilanga, Kalaallit Nunaannut tikeraaruma tamakku eqqartugassatta ilagaat.

Trumpimmi præsidentiunerata nalaani ataatsimiittoqarsimava?

- Erseqqissaaqqissinnaanngilanga.

AAMMA ATUARUK Isumaqatigiinniarnerit kigaappallaarnerat isornartorsiorneqartoq

Nuummi nunanut allanut tunngasunut Pisortaqarfiup Pituffimmi sullissinissamik isumaqatigiinniartoqarnersoq oqaatigerusunngilaa, Nunanulli allanut tunngasunut ministereqarfimmut innersuussilluni.

KNR-ip paasisai naapertorlugit 2014-imi sullissinissamut neqeroorsimasut ilaata U.S. Air Forcellu akornanni eqqartuussivilersuussinerit pissutigalugit isumaqatigiinniarnerit unitsinneqarsimapput.

Ministeri septembarimi Kalaallit Nunaannukassaaq tassanilu ilaatigut nunanut allanut tunngasunut naalakkersuisoq Suka K. Frderiksen naapittussaassuaa.

AAMMA ATUARUK Pituffik pillugu ukioq manna 2016-imi suliaq

AAMMA ATUARUK Nunarput USA-mut attaveqarnermi periusissiamik amigaateqartoq

AAMMA ATUARUK Amerikamiut umiarsuaat Pituffimmut assartuussisussatut inatsimmi salliutinneqartut