Pituffik: Isumaqatigiinniarnerit kigaappallaarnerat isornartorsiorneqartoq
Danskit nunanut allanut ministererisimasaata Martin Lidegaardip 2015-imi marsip qaammataani nalunaarutigaa Pituffimmi kiffartuussinissamik isumaqatigiissutit siunissami suliariumannittussarsiuunneqartarnerinut killiliussat suleqatigiissitat marluk isumaqatigiinniutigissagaat.
Aamma Kunngeqarfiup Danmarkip USA-llu illersornissamik isumaqatigiissutaanni danskit kalaallillu sulisorineqarnissaannik siunertaasoq siunissami malinneqassasoq, ataatsimoorussamik isumaqatigiissummi Joint Statementimik taaneqartumi oqaatigineqarpoq.
Maannali ukioq ataaseq qaammatillu qulit qaangiunnerini isumaqatigiinniarnerit suli nutaanik tusagaqarfiunngillat. Tamannalu Greenland Contractorsimi pisortap, Peter Kofoedip, isornartorsiorpaa.
- Joint Statement ukiut marlungajaat matuma siorna isumaqatigiissutigineqarpoq. Suliami aallartinneqartumi angusanik suli tusagaqanngilagut.
Nunanut allanut tunngasunut ministereqarfik kimigiiserfigeqqugaat
Greenland Contractorsip ingerlatseqatigiiffiit 2013-imi suliarimannittussarsiuussinermi aamma ajorsartuusut Copenhagen Arctic aamma Aarsleff peqatigalugit Folketingip Kalaallit Nunaannut tunngasunut ataatsimiititaliaanut suliap ingerlarnga pillugu saqqummiussaqarniarput.
Tamatumunngalu peqatigitillugu ataatsimiititaliaq kajumissaarpaat danskit nunanut allanut tunngasunut ministereqarfiat suliaq pillugu kimigiiserfigeqqullugu.
- Qulakkeerusutarput tassatuaavoq Kalaallit Nunaannut tunngasunut ataatsimiititaliami ilisimasanik peqartoqarnissaa - pisariaqartinneqarpallu - qanoq pisoqarsimaneranik nunanut allanut tunngasunut ministereqarfimmut apeqqutigineqassasoq, Peter Kofoed taama oqarpoq.
Aamma atuaruk USA: Pituffimmi kiffartuussinerup ukiut 1-3 qaangiuppata suliarimannittussarsiuuteqqinnissaa ilimanarpoq
Aamma atuaruk Nunanut allanut tunngasunut ministereqarfik atorfilittanik Pentagoniliartitsisoq
Taannami isumaqarpoq nunanut allanut tunngasunut ministereqarfik suliap naammassinissaanut piffissaqarluarsimasoq. Aamma Danmarkimi Folketingimut qinersisoqaraluartoq USA-milu nutaamik præsidenteqaleraluartoq.
- Ilumoorpoq nutaamik præsidenteqalersimanera (USA-mi, aaqq.). Tamannali aatsaat novembarimi paasineqarpoq, 2016-imili novembarip qaammataa sioqqullugu tamanna isummerfigineqarsimasinnaagaluarpoq. Aamma novembarimit januaarip 20-ata tungaanut periarfissaqartoqaraluarpoq oqassalluni suliaq misissuiffigalugulu naammassineqassasoq, Peter Kofoed oqarpoq.
Præsident Trumpip "America First" qineqqusaarutigaa - tassalu Amerika salliutillugu", amerikamiut soqutigisaat pingaarnerutinneqassasut oqaatigalugu. Tamannali Pituffik pillugu suliamut qanoq sunniuteqassanersoq nalunarallarpoq.
Isumaqatigiissutip annaavissorsinnaanera aarlerigaat
Ingerlatseqatigiiffiup amerikamiunit pigineqartup Exelis Servicesip kiffartuussinissamik isumaqatigiissummik ukioq manna oktobarip aallaqqaataa aallarnerfigalugu tunineqarnissaa USA-mi eqqartuussiviit 2016-imi naqissuserpaat. Tamatumali allanngortinneqarsinnaanissaa Peter Kofoedip neriuutigiuarsinnarpaa.
- Suli neriuutissaqarpoq, neriuulli ullut tamaasa milliartorpoq.
Aamma atuaruk Pituffik pillugu ukioq manna 2016-imi suliaq
Anguneqassanngikkaluarpallu, kiffartuussinissamik isumaqatigiissutip suliariumannittussarsiuuteqqinneqarnerani ingerlatseqatigiiffinnit danskit kalaallillu pigisaannit utertinneqarsinnaanerata ajornarnerulernissaa Peter Kofoedip aarleqqutigaa.
- Isumaqatigiissutimmi qanoq imaqarnissaa qanorlu suliariumannittussarsiuunneqarnissaa amerikamiut aalajangigassaraat. Aamma amerikamiut suliffeqarfiutaanuinnaq tulluarsakkamik suliariumannittussarsiuussinissaat takusinnaalluarparput.
