Amerikamiut umiarsuaat Pituffimmut assartuussisussatut inatsimmi salliutinneqartut
![](/sites/default/files/styles/image_934x467/public/article_images/retssal_dommer_hammer_blogtrepreneur_flickr.jpg?itok=Jyn_1-Vp)
Præsident Trumpip 'America First'-imik politikkeqarnera (USA salliutillugu, aaqq.) pissutigalugu Royal Arctic Linep, RAL, Pituffimmut assartuussinissamik isumaqatigiissut annaanngilaa.
Isumaqatigiissutip suliariumannittussarsiuunneqarneranut atortussani tamanna atuarneqarsinnaavoq.
Isumaqatigiissuteqarneq amerikamiut inatsisaannik, ukiunik 113-inik pisoqaassusilimmik toqqammaveqarpoq. Amerikami suliffissat inatsimmi tassani illersorneqarnissaat aamma siunertaavoq.
Inatsimmi ‘The Cargo Preference Act of 1904’-mi atuarneqarsinnaavoq amerikamiut illersornissaqarfiata iluani pilersuinermut tunngatillugu, amerikamiut umiarsuaat nunat allat umiarsuaannut naleqqiullugit salliutinneqassasut. Aamma nunani allani umiarsuaatileqatigiiffiit akikinnerusumik sullissinissamik neqerooruteqaraluarpata.
Amerikamiut ingerlatseqatigiiffiat akisunerusoq
Tamannalumi pivoq. Pituffimmut assartuussinissamik isumaqatigiissut januaarimi suliariumannittussarsiuunneqarmat RAL-ip ingerlatseqatigiiffik USA-mi Marylandimeersoq Schuyler Line Navigation ajorsarfigaa.
Schuyler Line Navigation suliassamut neqeroorpoq, taannalu Danmarkip Pituffiullu akornanni ukiumut marloriarluni assartuussinissamik, ukiut marluk ingerlanerini 57 millionit koruuninik akeqartussamik, neqerooruteqarpoq.
Tamannalu RAL-ip neqeroorutaanit marloriaammik akisunerusoq, RAL-ip ilisimatitsissutigaa.
Suliariumannittussarsiuussinermulli atortussani Danmarkimi Nunatsinnilu umiarsuaatileqatigiiffiit neqerooruteqarnissaannut kajumissaarneqarput, taakku suliariumannittussarsiuussinermi pingaarnersiuinermi tullertut isigineqassammata, taamaattumillu amerikamiut umiarsuaatileqatigiiffiinik suliariumannittussarsiuussinermut peqataasoqassanngikkaluarpat periarfissaqassammata. Aamma amerikamiut neqeroorutigisaat akisuallaassagaluarpata imaluunniit inunnik assartuussinerup iluani akigitinneqartunit akisunerussagaluarpata.
Schuyler Line Navigationsilli aki neqeroorutigisaa ima angivallaarsimatiginngimmat RAL-ip neqeroorutaa akuerinagu USA-p ingerlatseqatigiiffik taanna toqqarsimavaa.
Inatsit USA-mut akisusoq
RAL-ip KNR-imut mailikkut ilisimatitsissutigaa amerikamiut Københavnimi aallartitaqarfianni ataatsimeeqateqarnermi Assartuussinermut inatsit innersuussutigineqarsimasoq. RAL-ili amerikamiut Pituffik pillugu suliariumannittussarsiuusseqqinnissaanut neqerooruteqaqqinnissamut kaammattorneqarsimavoq.
RAL-ip pisortaanerata, Verner Hammekenip, suliariumannittussarsiuussinerup inernera uggoraa, KNR-imulli oqaatigalugu annaasaqarnertik umiarsuaatileqatigiiffiup missingersuutaanut pingaarnerpaajunngitsoq.
Amerikami kongressip 2015-imi nalunaarusiaani atuarneqarsinnaavoq USA-p umiarsuaataanik salliutitsinissamik malittarisassaqarnera pissutigalugu, umiarsuaatileqatigiiffiit nunanit allaneersut akigititaannut naleqqiullugu naalagaaffik assartuussinermut aningaasartuuteqarnerusoq.
Schuyler Line Navigationip toqqarneqarneranut suna tunngavilersuutigineqarsimasoq KNR-ip amerikamiut Københavnimi aallartitaqarfiannut paasiniaraluarpaa. Tamannali KNR-ip tallimanngornermi suli akissutissarsinngilaa.