Nunarput USA-mut attaveqarnermi periusissiamik amigaateqartoq
Nunatta USA-llu akornanni pissutsit pillugit Nunarput erseqqissumik periusissiorpat iluaqutaassaqisoq, nalunaarusiami nutaami ilaatigut inerniliunneqarpoq.
Ilisimatuut nalunaarusiortuusut Nunatsinni, Danmarkimi USA-milu atorfilittanik politikerinillu apersuisimapput.
Naalagaaffeqatigiinniittugullu ataatsimuunnginnerput ajoqutaasoq aamma inerniliunneqarpoq. Taavalu USA-mut attaveqarnerput pillugu erseqqissumik anguniagaqannginnerput ajornartorsiutaavoq.
AAMMA ATUARUK Danmarkip nunarput pimoorunnerusariaqaraa
Pituffimmi kiffartuussinermut isumaqatigiissummut suliaq Nunatsinni politikerinit atorfilittaniillu apersorneqartunit iluarineqanngilaq.
- Siunissarli ungasinnerusoq eqqarsaatigalugu sumik angusaqarusunnersut oqaluttuartikkuminaatsipparput. Tassalu Kalaallit Nunaat siunissami sumik angusaqarniassanersoq, qanorlu taakku anguniarneqassanersut, Syddansk Universitetimi adjunkti, nalunaarusiamillu Grønlandskortetimik allaaserinneqataasoq, Jon Rahbek-Clemmensen oqarpoq.
Danmarkip kalaallinik ajuallatsitsinissaq annilaangassutigigaa
Naalagaaffeqatigiit USA-llu akornanni pissutsit nalunaarusiami allaaserineqarput. Tassanilu Nunatta Danmarkillu akornanni tatigeqatigiinnginneq USA-mut attaveqarnermi angusarineqarsinnaagaluartunut ajoqutaasorujussuusoq, nalunaarusiami inerniliunneqarpoq.
Ilaatigut Danmarkimi atorfilittat periusissiornissartik unammillernartippaat.
- Kalaallinik ajuallatsitsinissaq annilaangassutigineqarpoq, tamannalu pissutigalugu siunnersuusiornissaq nutaanillu isumassarsionissaq annilaangassutigineqarluni, Rahbek-Clemmensen oqarpoq.
AAMMA ATUARUK Danmarkip NATO-mit akikillisaavigineqartarnera takussutissaqanngitsoq
Nunatsinnilu politikerit periusissiassamik siunnersuuteqanngillat.
- Ilisimasallit, politikerit atorfilittallu kalaallit aperineqaraangamik ersernerluttumik aningaasarsiornikkut ineriartortitsinnissaq kisaatigalugu akisarput, Jon Rahbek-Clemmensen oqarpoq.
Nunarput Issuttumut periusissiamut ilaatinneqarnerussasoq
Taanna naapertorlugu naalagaaffeqatigiit nunarsuarmi aningaasarsiornerpaamut, tassalu USA-mut, attaveqarluarpata iluaqutissartaqarpoq.
USA-meersut nunat allat akuliuteqqunagit nunatsinniippata Issittumiippatalu, naalagaaffeqatigiinnut iluaqutaavoq. Aammali assersuutigalugu Nunatta eqqaanilu imartani annaassiniartarnerni suleqatigiinnermi tunngasuusinnaavoq.
AAMMA ATUARUK Pituffik pillugu ukioq manna 2016-imi suliaq
Taamaammat Issittumut periusissiaq 2020-mi atorunnaarpat periusissiassamut tulliuttumut aalajangiinernut danskit naalagaaffiata Nunarput Savalimmiullu ilaatittariaqarai, Jon Rahbek-Clemmensen isumaqarpoq.
- Nuna ataasiinnaanngitsoq, kisianni nunat pingasut ataatsimoorussamik periusissioqatigiissasut Issittumut periusissiap nutaap ersersittariaqarpaa, Jon Rahbek-Clemmensen oqarpoq.