Danmarkip nunarput pimoorunnerusariaqaraa
Københavnip universitetani sakkutooqarnikkut ilisimatusarfimmit suliarineqartumi nalunaarusiami taama innersuussisoqarpoq.
Nalunaarusiami Danmarkip USA-mut sunniuteqarnerani Issittoq qanoq pingaaruteqartiginera pineqarpoq.
Iisimatuut oqarnerat naapertorlugu Danmark Kalaallit Nunaallu, USA-mut sunniuteqarnerunissamut periarfissat pitsanngoriartissinnaavaat, Atlantikup avanaanut soqutiginninnerup annertusineqarneratigut nunanullu allanut politikkimi issittoq pillugu periussissiamik ersarissumik sananikkut.
Periusissiamik erseqqarissumik suliaqarnissaq piumasaqaateqarpoq, tassalu Danmarkip Kalaallit Nunaata akornanni pissutsit ajunnginnerulissasut aamma aalajangiinerni Kalaallit Nunaata peqataatinneqarnerunissaa.
- Kalaallit Nunaani oqartussaasut pingaartumillu politiikerit inatsisartuni ilaasortat aalajangiisoqassatillugu peqataatinneqartariaqarput, Folketingemi ataatsimiititaliat ingammik nunanut allanut isumannaallisaanermut ataatsimiititaliap kalaallit politiikerii qaaqqullugit tusarniarneqarnerusariaqarput, nalunaarusiami taama innersuussisoqarpoq.
AAMMA ATUARUK Naalagaaffeqatigiit nunanut allanut attaveqartarneranni Nunarput iluaqutaasartoq
Ilisimatuut nalunaarusiamik suliaqartut siunnersuuteqarput, Issittoq imaluunniit naalagaaffeqatigiinneq pillugu ministereqartariaqartoq aalajangiisarnerni Kalaallit Nunaata peqaataatinneqarnissaa qulakkeerneqassammat.
Issittoq pillugu periusissiaq maannakkut atuuttoq 2020-mi atorunnaassaaq, nutaamillu periusissiortoqarnissamut atatillugu qallunaat politiikerii isummertariaqarput, aalajangiisoqassatillugu Kalaallit Nunaanni oqartussaasut politikerillu qanoq peqataatinneqassanersut, nalunaaarusiami taama innersuussisoqarpoq.
