Olsvigip politikkimik suliaqarnera: Politikeri nuannarineqarluartoq inuulluaqqusivoq
- Qujavunga sulliassarnut tunniusimalluarlutit sullittarsimagatsigut. Angusaqarnikooqaatit.
Sara Olsvigip politikkimik suliaqarunnaarluni nalunaaruteqarneranut oqaaseqaatit ilaat taama oqaasertaqarpoq. Taama-ittullu arlaqarput.
Olsvigip politikkimik suliaqarunnaarluni nalunaaruteqarnera politikkikkut unammillertigisaanit aamma uggorineqarpoq. Siumumi naalakkersuisunilu siulittaasoq Kim Kielsen, Partii Naleqqallu siulittaasua Hansen Enoksen KNR-imut ima oqarput:
AAMMA ATUARUK Sara Olsvig Inuit Ataqatigiit siulittaasuattut tunuartoq
- Uanga suleqatigilluarnikooqara. Taama oqarusuppunga. Nuannersumik suleqatigisarsimaqaara. Aamma isummertarpoq, tamakkualu suliakkiissutigineqartut qulaajarluartarpai. Taanna amigaataassaqaaq, suleqatigalugu nuannertaqigami, Kim Kielsen taama oqarpoq.
- Soorunami ajuusaarnarpoq, aamma ukiorpassuarni suleqatigereerlugit, isummersoqatigisareerlugit. Tamatigut aamma isumaqatigiittuaannanngikkaluarluta soorunami piginnaasaqarpoq inuiaqatigiinni sullissinermigut, taannartaa uggornarpoq, kisianni tassa nammineq tunuarluni nalunaarnera tusaatissatut ataqqillugulu tiguara, Partii Naleqqap siulittaasua Hans Enoksen oqarpoq.
Sara Olsvig politikkimik suliaqarnermi aallartinneraniilli nuannarineqarluarpoq.
Politikkikkut suliaqarnera 2011-mi pimoorussamik aallartippoq, Folketingimi ilaasortatut taamani qinigaangami. 7.956-inik taaguunneqarluni qinersinermi taaguunneqarnerpaavoq Inuit Ataqatigiillu Folketingimi ilaasortaatitaqarnissaat qulakkeerpaa.
Ukiullu marluk qaangiummata Inatsisartunut qinigassanngortippoq, 1030-nit taaguunneqarluni qinigaavoq taaguunneqarnerpaani normu 5-iulluni.
AAMMA ATUARUK Sara Olsvig ny formand for Inuit Ataqatigiit
Kuupik Kleist Inuit Ataqatigiit siulittaasuattut ukiup tulliani tunuarmat Sara Olsvig siulittaasunngorniuunnermi sassarpoq.
Aqqaluaq B. Egedelu siulittaasussatut qinigassanngortipput, ataatsimeersuarnermilu aallartitat taasinerisa inernerat qanittuararsuuvoq 37-35-iulluni. Sara Olsvig Inuit Ataqatigiinni siulittaasunngorpoq.
Kim Kielsen naalakkersuisooqatigiinnik Siumup, Inuit Ataqatigiit Partii Naleqqallu peqataaffigisaannik 2016-imi oktobarip qaammataani pilersitsivoq. Sara Olsvig Naalakkersuisut siulittaasuannut tullersortinngortinneqarpoq Isumaginninnermullu, Ilaqutariinnut, Naligiissitaanermut Inatsisinillu atuutsitsinermut naalakkersuisunngorluni.
AAMMA ATUARUK Qinersinermi ajugaasut ajorsartullu
2018-imi apriilip 24-ani Inatsisartunut qinersisoqarpoq. Inuit Ataqatigiit 7.6 procentpointinik kinguariarput. Inuit Ataqatigiit annaasaqarnerpaapput Siumut tulleralugu. Inuit Ataqatigiit qinersinerup kingorna naalakkersuisunngortitsineq peqataaffiginngilaat.
Sara Olsvigilu ataasinngornermi oktobarip 29-ani politikkimik suliaqarunnaarpoq. Inuit Ataqatigiit siulittaasuattut tunuarpoq Inatsisartunilu ilaasortaanerminit novembarip tallimaani tunuarniuteqarniarluni.
