Politikeri: Kalaallit Nunaanni politikerit piviusoq takujumanngilaat
Folketingip Namminersorlutik Oqartussanik Nunattalu aningaasaqarneranik ingerlanerliortumik sakkortuumik isornartorsiuinissaanik siunnersuut Folketingimi amerlanerussuteqartut januaarip qaammataani itigartitsissutigaat.
Siunnersuut Dansk Folkepartiimeersuuvoq, ilaatigut mittarfinnut nutaanut pingasunut aningaasaliinissaq, partiip Kalaallit Nunaannut tunngasunut oqaaseqartartuata Søren Espersenip Nunatta 'aningaasaqarnikkut isasoornissaanut' aqqutissatut taasaa tamatumunnga pissutaalluni.
AAMMA ATUARUK Kalaallit Nunaanni naammaginanngitsumik ingerlatsisoqarpoq
Folketingilu siunnersuummut itigartitsigaluartoq SF-ip Kalaallit Nunaannut oqaaseqartartuata Karsten Høngep Nunatsinni Danmarkimilu politikerit appisaluuppai. Pingaartumillu namminiilivinnissap aningaasaqarnikkut kingunerisassanut avissaartillugu oqallisigineqarnera isornartorsiorpaa. Allaanngilaq Inatsisartuni politikerit piviusoq takujumanngikkaat, Karsten Hønge KNR-imut taama oqarpoq.
- Ilumut kissaatigigaanni namminiilivittoqarsinnaavoq. Kisianni ima eqqarsartoqassanngilaq namminiilivinnissamik aalajangiiginnartoqarsinnaasoq tamannalu aningaasaqarnikkut sunniuteqarnavianngitsoq. Sunniuteqassaarmi. Sakkortuupilussuarmik sunniuteqassaaq. Tamannalu tunngavigalugu oqallinneq ingerlanneqartariaqarpoq.
Danmarkimi politikerit oqaaseqarnissaminnut sapiissuseqarnerusariaqarput
Nunatta namminiilivinnissaa tapersersorlugu Høngep erseqqissaatigaa, tamanna 'innuttaasut akornanni amerlanerussuteqarluartunit' kissaatigineqassappat.
Peqatigisaanilli naalagaaffeqatigiinneq aamma nuannarisorujussuuaa. Aamma Danmarkimi politikerit Nunatsinnut tunngasut akuliuffiginaveersaarunnaarlugit ineriartorneq akuliuffigisariaqarpaat, soorlu nunani allani inuiaqatigiit ineriartornerat oqaaseqarfigisaraat.
- Kalaallit Nunaanni ajornartorsiuteqarpat, taava eqqarsartarpugut, taakku kalaallinit oqallisigineqartariaqarput. Aamma taamaaliortussaapput. Aammali isumaqarpunga Kalaallit Nunaanni meerarpassuit inuusuttorpassuillu inuiaqatigiinni atugarliornerat uanga isummerfigissagukkit ajortussaqanngitsoq. Kalaallit Nunaanni inuiaqatigiinni naligiinnginneq annertuupilussuuvoq, Karsten Hønge taama oqarpoq.
AAMMA ATUARUK Løkkep nunatsinni free associationeqalernissaa itigartitsissutigigaa
Pingaartumillu Nunatsinni isumaginninneq ilinniartitaanerlu pillugit oqallinnerup isorinnittumik oqaaseqarfigineqarnissaa ujartuiffigaa. Tamanna Hønge naapertorlugu, Nunatsinni partiit amerlanersaasa 'uungaannaq isigisumik nunagisamillu pingaartitsillutik iluareqqussaarniarnerisa' tunuani toqqorterneqarpoq.
- Uanga naligiinnginneq, meeqqat sumiginnakkat ilinniartitaanerullu inuiaqatigiinni nutaaliaasuni qaffasissutsimut naatorsuutigineqartariaqaraluartumut nallersuunneqarsinnaannginnera samminerussagaluarpakka - isumagami malillugu oqallinneq taanna maannamit qitiutinniarnerusariaqaraluarpoq, Hønge oqarpoq.
SF-illu partii suleqatigisaa IA - tupaallannanngitsumik - kisiartaalluni isumaginninnikkut ajornartorsiutit namminiilivinnissarlu pillugit oqallinnermi 'silatusaartumik oqaluppoq'. Erseqqissaatigali partiip ineriartorneq kisimiilluni pitsaanerusumut saatissinnaanngikkaa.
- Namminiilivinnissap anguniagaanera IA-p aalajangiusimavaa, tamatumunngali peqatigitillugu imaanngilaq atukkatigut ajorseriaateqartitsissappat anguniagaq angorusunneqartoq, Karsten Hønge taama oqarpoq.
AAMMA ATUARUK Namminiilivinnerup Danmarkimit ikiorsiissuteqartarneq unitsissavaa
