IA: Sakkutuujusussaaneq kalaallinut atuutissanngilaq

Sakkutuujusussaaneq kalaallit inuusuttaannut atuutsinneqassanngilaq.

Dansk Folkepartiimut ilaasortat sakkutuujusussaanerup Nunatsinni Savalimmiunilu eqqunneqarnissaanik siunnersuutaata Folketingimi oqaluuserineqarnissaa sioqqullugu Inuit Ataqatigiit Folketingimi taama isumaqarput.

- Sorsunnermut peqataanissaq Nunatsinni soqutigisarinngilarput. Nunatta sorsuffiunnginnissaa soqutigisupilussuuarput. Taamaammat aamma isumaqarpunga Nunatsinni suliassat piginnaasallu Nunatsinni pisariaqartitavut qitiutinneqartariaqartut, Aaja Chemnitz Larsen KNR-imut taama oqarpoq.

IA: Kajumissutsimik peqataarusunneq sammineqarli

Illersornissamut qullersaqarfiup tamatumunnga taarsiullugu, kalaallit ilaatigut Nunatsinni kajumissutsimik ulapungaarsimaniartussanut peqataanissaat, issittumilu pissutsinut immikkut tulluarsakkamik Illersornissaqarfiup iluani tunngaviusumik ilinniagaqartissinnarlugit, Issittumi Sakkutooqarfimmi atorfeqalernissaat sulissutigisariaqarpaa.

Kalaallilli inuusuttaat piffissaq ungasinnerusoq eqqarsaatigalugu nunani tamalaani sorsunnermut peqataatinneqaratarsinnaallutik pinngitsaaliissummik sakkutuujusussaatitaassanngillat, Aaja Chemnitz Larsen taama isumaqarpoq.

Illersornissamut qullersaqarfiup sorsunnermut peqataanissaa Folketingimiinnaq ullumikkut aalajangiiffigineqartarpoq, Nunatsinnilu Inatsisartut Savalimmiunilu Lagtingi taamatut aalajangiisoqassatillugu peqataatinneqartaratik.

- Nunatta sorsunnermut peqataanissaanik kissaateqartoqarpat, taava isumaqarpunga Nunatsinni qinikkat tamarmik akuutinneqarnissaminnut periarfissaqartinneqartariaqartut, Inuit Ataqatigiinneersoq taama oqarpoq.

Sorsunnermulli peqataanissamik aalajangiinissamut Nunarput oqaasissaqartitaassagaluarpat sorsunnermullu peqataanissamut tapersiissagaluarpat, kalaallit angutit arnallu sakkutuujusussaatitaassanersut akiumanngilaa.

- Isumaqarpunga taamatut assersuusiorneq eqqarsarnerinnaasoq, taamaammat oqaaseqarfigerusunngilara, Aaja Chemnitz Larsen oqarpoq, Inuit Ataqatigiilli Nunatta sorsunnermut peqataanissaanut akerliunera erseqqissaatigalugu.

Aleqa: Aatsaat Nunatta iluaqutigissappagu

Folketingimi attaviitsup Aleqa Hammondip sakkutuujusussaanerup annertusarniarneqarnera ammaffigaa - aatsaalli nunatta iluaqutigissappagu.

- Peqataatitsiniarneq annertusarneqassappat nunatsinni sakkutooqarfinni peqataasinnaaneq angujumallugu annertusaasinnaanerat ajoriffissaqartinngilara, soorlu imartatta nakkutiginerani suliassaqarfinni, KNR-imut mailikkut taama allappoq nangillunilu:

- Pinngitsaaliissummik kalaallit Danmark illersorniarlugu sakkutuujutinneqalissappata naaggavik.

Savalimmiormiup Folketingimut ilaasortap Javnaðarflokkurineersup Sjúrður Skaalep sakkutuujusussaanerup Savalimmiuni eqqunneqarnissaanut akerliulluni oqaatigisimavaa.