Danskit Illersornissaqarfianeersut upernaamut pilerisaariartorlutik nunatsinnukalersut
Kalaallit Nunaanni inuusuttut pinngitsaalisaallutik sakkutuunngortinneqartanngillat, illersornissamulli ministerip Nicolai Wammenip aalajangiisinnaagaluaruni iluarissangaluarpaa kalaallit inuusuttut amerlanerusut sakkutuunut ilanngutsissallugit - ingammik naalagaaffeqatigiit avannarpasissortaanni.
- Nuannarissangaluarpara, kalaallinik kingoqqisut amerlanerit peqataalissangaluarpata. Ingammik Kalaallit Nunaanni, Atlantikup Avannaani issittumilu suliassanut.
Illersornissamut ministeri Aarhusimi Kalaallit Illuutaanni ataasinngornermi taama oqarpoq.
Kalaallit inuusuttut namminneq piumassutsiminnik ullumikkut sakkutuunngorsinnaapput- assersuutigalugu Danmarkimi "Sakkutuunut ullorititamut" peqataareersimatillutik.
AAMMA ATUARUK Kalaallit aamma sakkutuujusinnaanngortariaqarput
Upernaamulli suliniut taanna nunatsinni illoqarfinni arfineq marlunni ingerlanneqassaaq.
- Danmarkimi ingerlanneqartartoq "Sakkutuunut ullorititaq" Kalaallit Nunaanni upernaamut ingerlanniarparput. Taamaalillutik kalaallit inuusuttut sakkutuunngorusuttut Danmarkiliaqqaaratik sakkutuunngortarneq paasisaqarfigisinnaassavaat. Sakkutuut Kalaallit Nunaaliassapput, isumaqarpungalu sakkutooqarnerup iluani atorfinni periarfissat pissanganartut arlallit isinik ammaasinnaassasut, ministeri oqarpoq.
Ministerip Aarhusimi siunnersuutaa pillugu, kalaallit inuusuttut aperigaanni tamanna isumassarsiatsialattut isigineqarpoq. Mikkel Sødergård ima isummerpoq: Isumaqarluinnarpunga soqutigineqassasoq, ministerimmi oqarneratut Sakkutuunut ulloritinneqartumut ornigunnissaq maannakkut ajornakusuungaatsiarpoq. Taamaattumik isumaqarpunga soqutigineqarnissaa ilimanaatilipilussuusoq, inuusuttoq nunatsinneersoq oqarpoq.
