Kalaallit aamma sakkutuujusinnaanngortariaqarput
- Uani ujartunngilara kalaallit sakkutuutut sorsuttartutut pinngitsaaliinnikkut ingerlaqqinnissaat, Niels Thomsen taama oqarpoq.
Danmarkimi sakkutuutut ilinniarsimasut 18-niit 49-it tikillugit ukiullit, sorsuttoqalissagaluarpat qaaqquneqarsinnaasut inuit milliuunit ataallugit amerlassuseqarput. Ukiullu tamaasa, aamma inuusuttorpassuit sakkutuujusussaannertik pissutigalugu sakkutuutut ilinniartarlutik.
Kalaallit inuusuttut akisussaaffimmik annertuumik, tunineqarnissaat Niels Thomsenimit piffissanngorsorineqarpoq.
- Malugisarpara illoqarfinni angalatillunga, inuusuttorpassuit susaqarpiaratik tarfiinnartut takussaasartut. Inuit taakku ikiorusuppakka. Periarfissillugit paasitillugillu nunatsinniit atorfissaqartinneqartut, Niels Thomsen oqarpoq.
Oqallisissiaq tassa nunatsinni sakkutuutut ilinniarsinnaanngornissaq piviusunngortinneqassappat, tamanna nunatsinnut akikinnavianngitsoq Niels Thomsenimittaaq eqqarsaatigineqareersimavoq.
- Aningaasartassaat eqqarsaatigillatsiarsimavara, suliaq uunga killissappat inatsisartuni soqutigineqarluni, taava aningaasatigut inissisimavissaq misissuiffigilluassavara aalajangigassanngorlugulu siunnersuutigalugu, Niels Thomsen oqarpoq.
Namminersuleriartorneq ilutigalugu, kalaallit nammineernerulernissarput aammattaaq pisariaqartoq Niels Thomsen isumaqarpoq.
- Isumaqarpunga pissusissamisoortoq, namminersuleraluttuinnarnitsinni aamma akisussaaffimmik annertunerusumik tigusinissarput, Demokraatit sinnerlugit Inatsisartuni ilaasortaq Niels Thomsen oqarpoq.