Inuiattut ullorsiorneq: Danmarkimi makkunani nalliuttorsiorsinnaavutit
Nunatsinni inuiattut ullorsiornermut atatillugu Danmarkimi naalagaaffiup illorsuini Erfalasorput ukiut pingajussaanik erfalatinneqassaaq.
AAMMA ATUARUK Namminersorlutik Oqartussat inatsisitaarfimmi erfalasulinngitsoortut
Ullorsiornissamullu sulinngiffeqartut pingaartumik Kalaallit Illutaanni nalliuttorsiorpalaarnermik sammisaqarnissat ornissinnaavaat.
Inuiattut ullorsiorneq Jyllandip avannaani Aalborgimi Gammeltorvimi ullaakkut erinarsoqatigiinnermik aallarnerneqassaaq, tamatuma kingorna ullaakkorsioqatigiittoqassaaq, Kalaallit Illuutaata aaqqissuussaanik. Oqalugiarnerit ualikkut pilersaarutinut ilaapput, Socialdemokraatit siulittaasuat, Mette Frederiksen ilaatigut oqalugiassalluni.
AAMMA ATUARUK Kalaallit Nunaata naalagaaffiinngornissaa Mette Frederiksenip tapersersorpaa
Kalaallit Illuat Aarhusimiittoq illup avataani ukiup aappassaanik inuiattut nalliuttorsiortitsissaaq. Tamanna VIA University Collegemi Aarhusip illoqarfiata qeqqaniittumi pissaaq, tassani Aarhusimi kultureqarnermut innuttaasunullu sullissinermi politikkikkut qullersaasoq, Rabih Azah-Ahmad ilaatigut oqalugiassalluni.
Kalaallit meerartaat pillugit peqatigiiffik, Forening Grønlandske Børn, pinnguaatinik qarasaasiakkut piviusorpalaartulianik tassa Virtual Realitynik misiliisoqarsinnaatissavaa.
AAMMA ATUARUK Aajap erfalasorput Folketingimi erfalatikkusukkaa
Odensemi Kalaallit Illuat naatsiivimmi tikilluaqqusissaaq, taava illup iluani Royal Greenlandimit nerisassanik ualikkut misiliisoqarsinnaavoq kiisalu Christian Søgaard trio aamma Ulf Fleischer appisimaassallutik.
Københavnimi Kalaallit Illuat nalunaaqutaq ataatsiniit unnuap qeqqata tungaanut pilersaaruteqarpoq, ilaatigut oqalugiartoqassaaq, kaffillertoqassaaq ingerlaaqatigiittoqarlunilu. Pilersaarut tamaat uani takusinnaavat.