Aajap erfalasorput Folketingimi erfalatikkusukkaa

- Tamanna assorsuaq pingaaruteqarpoq, naalagaaffeqatigiinnimi Kalaallit Nunaannut, Savalimmiunut Danmarkimullu tamat oqartussaaqataanerannut Folketingi sinniisoqarfiuvoq.

- Folketingi inatsiserpassuarnik Kalaallit Nunaat sinnerlugu aallussisarmat, aamma isumaqartupilussuuvoq uagut erfalasutta aamma ataatsimiittarfimmiinnissaa, Inuit Ataqatigiit Foketingimut ilaasortaatitaat oqarpoq.

Iluarsartuussisoqarnerata kingorna Foketingip siulittaasuata Pia Kjærsgaardip ukioq ataaseq missiliorlugu qaangiuttoq dannebrogi angisuupilussuaq ataatsimiittarfiup tunuanut nivinngartimmagu oqallisaasupilussuuvoq.

- Kalaallit erfalasuat aamma taqqamunga nivinngarneqaraluarpat kalaalerpassuarnut tamanna assorsuaq isumaqassasoq, Aaja Chemnitz Larsen isumaqarpoq.

Kalaallit Nunaanni inuiattut ullorsiortoqaraangat pisortat illuutaanni tamani kalaallit erfalasuannik amusisarneq danskit oqartussaasuisa ileqqorilingaat ilanngullugu eqqaavaa:

- Kalaallit Danmarkimi erfalasorput takungaangamikku amerlasuut tuppallerlutik qullililersarput, tamannami naalagaaffeqatigiinnermi Kalaallit Nunaannik akuersinertut paasisaramikku, Aaja Chemnitz Larsen oqarpoq.

Savalimmiulli erfalasuata Folketingip ataatsimiittarfianiinnginnera ilaasortap savalimmiuneersup Sjurdur Skaalep amigaatiginngilaa, taanna savalimmiuni socialdemokraatit sinnerlugit Folketingimi ilaasortaavoq.

- Uagut aamma Dannebrog Lagtingip ataatsimiittarfianiitinngilarput, taanna Ritzauimut oqarpoq.

AAMMA ATUARUK Folketingimi ukioq nutaaq aallartittoq