Ikiaroornartuerniat eqqartuunneqartut

Allattoq Mads Lynge
novembarip 21-at 2006 17:37

Ullumi eqqartuussinermi ilisimannittutut pingaarnertut inissisimasoq oqaaseqarumanani tunuarterpoq, killisiorneqarnissaminullu itigartitsilluni. Maannakkullu apeqqutalerpoq, eqqartuussisut ilisimannittutut pingaarnertut inissisimasup killisiorneqarnermini oqaatigisimasai tunngavingalugit pineqaatissiissanersut.

Angutit pingasut ikiaroornartumik eqqussuisarsimanerat tuniniaaqqittarsimanerallu, naalannginniutaannaasimanerpa, imaluunniit pinerlunnerusimanerpa inunnit pikkorilluinnartunit aningaasannanniutigineqarsimasoq?

Taakkuupput apeqqutit eqqartuussisut nalunaaqqutaq arfineq marlunut pineqaatissiinermikkut Nuup Eqqartuussiviani akisassaat.

Suliamillu uannga aalajangiisussat ilagaat ilisimannittutut pingaarnertut inissinneqarsimasup nassuiaatigisimasai, eqqartuussisut upperissaneraat imaluunniit naamik.

Ilisimannittutut pingaarnertut inissisimasoq tassaavoq, arnaq inuusuttoq 21-nik ukiulik, taanna ullumi Qaqortumi pineqaatissinneqarsimasut isertitsivianiit tv-ikkut attaveqarnikkut eqqartuussivimmi nuivoq.

Arnaq suliamut uunga attuumassuteqartumut eqqartuunneqareerluni ukiunik marlunnik pineqaatissinneqarsimavoq.

Tusarnaartullu ilisimannittup killisiorneqarnissaa ilimangisimagaluarpaat, kisianni naamik.

-Killisiorneqaleruma apeqqutigineqartussat akerusunngilakka.

Arnaq oqarpoq. Ingerlatiinnarlugulu oqaatigaa ilisimannittutut nassuiaatigisimasani upperineqarsinnaanngitsut.

Killisiorneqarumannginnerminullu tunngavilersuutigai, pisimasut ingerlannnaq qaangerniaannarumallugit, ikinngutinilu asasani ajortumik perusunnagit.

Apeqqutaalluinnalerporlu arnaq taanna tatigineqarsinnaanersoq.

Unnerluussisoq isumaqarpoq, arnaq ilisimannittoq tallimanngormat eqqartuunneqarnermi nalaani nassuiaatigisimasani naqissusersimagamigit, tatiginassuseqartoq.

Illersuisulli arnap tatiginannginnera tunngavilersorpaat, ikiaroornartumillu tuniniaarnerminut atatillugu suleqatigisartakkani allat illersorlugit pisuutitsineq ukununnga pingasunut tutsinniarsaringaa.