Igitassanik immikkoortiterisalernissamut siunnersuut isorineqartoq
Kommunaqarfik Sermersuumi kommunalbestyrelsimi ilaasortap siunnersuutigaa igalaamerngit savimerngit allallu pinngortitamut ajoqutaasinnaasut innuttaasunit immikkoortiterneqartalernissaat aqqutissiuunneqassasoq.
Aamma atuaruk Igitassat innuttaasunit immikkoortiterneqartalissasut
Allan Pertti Frandsen, Inuit Ataqatigiinneersoq siunnersuuteqartuusorlu, isumaqarpoq Qeqqata Kommuniani periuseq atorneqartoq aamma Nuummi atulersinnaasoq. Qeqqata Kommuniani igitassanik immikkoortiterisarnermik ukiualunni misilittagarineqarpoq. Igalaamerngit aserorterlugit asfaltiliornermut misiliutitut atorneqarput, savimerngillu namminersortunut suliakkiutigineqartarlutik. Aamma Sisimiuni nerisakut suliffeqarfinneersut naggorissaatitut atorneqartarput.
Sisimiuni igitassanik immikkoortiterisarlersimanermut pissutaavoq illoqarfiup ikuallaavia igitassat amerlavallaarneri pissutigalugit angummassinnaasimanngimmat.
Nuummi pissutsit allaasut
Nuummili pissutsit taamaanngillat. Henrik Molbech oqaluttuarpoq Nuummi igitassanik ikuallatassanik amigaateqarlutik, naak Kapisilinnit Paamiuniillu igitassanik pissarsisaraluarlutik. Taassuma igalaaminernut igitassanut immikkut eqqaavilersuinissamut eqqarsarneq isumaqatiginngilaa.
- Igalaamerngit ikuallattarneri ingerlatiinnarusuppara. Siullertut igalaamerngit aakkaangamik ikuallaaviup ilua salittarpaat, aappaattullu uagutsinnit aningaasatigut iluaqutissartaqanngilaq, Henrik Molbech nassuiaavoq.
Taassuma aamma oqaatigaa igalaamerngit immikkoortinneqartalissappata asfaltimullu atugassiatut aserorterneqartalerlutik ikuallaavimmut aningaasartuutaaginnassasoq, tassami atortussanik pisisariaqassagamik.
Qillertuusalli savimerngillu namminersortunit isumagineqartalersinnaasut isumaqarpoq.
- Neriuppunga Iserit aamma INI A/S qillertuusanut assigisaannullu containereqalernissamut aningaasaleeqataarusussasut. Savimerngit atoqqitassatut tunisassiarineqarsinnaapput namminersortunillu aningaasarsiutaasinnaallutik, Henrik Molbech oqarpoq.
Toqunartullit isiginiarneqarnerusariaqartut
Ikuallaavimmi pisortap siunnersuuteqartup tunngavilersuutai isumaqatiginngikkaluarlugit pinngortitap eriagineqarneruniarnera nuannaarutigaa.
- Igitassat uuliamik akullit, batteriit allallu akuutissat ulorianartut isiginiarnerusariaqarpagut. Tassami Nunatsinnut eqqussorneqartut qiviarutsigit annikitsuinnaat uagut tigusarpagut. Taakkuuppullu avatangiisitsinnut pigajuttartut, Henrik Molbech naggasiivoq.