Igitassat innuttaasunit immikkoortiterneqartalissasut

Innuttaasut eqqagassat suuneri aallaavigalugit eqqagassat immikkoortitertalissagaat, Inuit Ataqatigiinnit Kommuneqarfik Sermersuumi kommunalbestyrelsimi ilaasortaq Allan Pertti Frandsen siunnersuuteqarpoq.
Assi © : Google maps
Allattoq Mads Pedersen
marsip 11-at 2015 15:43

Ullutsinni eqqagassat suugaluartulluunniit eqqaavimmut ataatsimut iginneqartarneri sumiiffinnii amerlanerni nalinginnaavoq. Igalaamerngit, qillertuusat, qarasaasiat allarpassuillu eqqavinnut containerinut pulasinnaasut ataatsimut eqqarneqartarput.

Tamannali allanngoriaannaavoq. Tassami Allan Pertti Frandsenip, IA-meersup, eqqagassat innuttaasunit immikkoortiterneqartalernissaat akuerisassatut siunnersuutigaa.

- Isumaqarpunga eqqagassat annikillisinnissaannut tamatta pisussaaffeqartugut, taamatullu eqqagassat tungaatigut mingutsitsinnginnerusumik periuuseqalernissamut aamma pisussaaffeqarluta, Allan Pertti Frandsen oqarpoq, nangillunilu;

- Aammattaaq kommunalbestyrelsemi ilaasortatut isumaqarpunga pinngortitaq illersornerusariaqaripput ulluinnarnilu eqqagassiarisartakkagut ikuallaavimmi ikuallanneqartartut annikillisarlugit. Taamaammat innuttaasunut suliffeqarfinnullu kommunitsinniittunut eqqagassanik immikkoortitsisalernissamut pitsaasumik periarfissiisariaqarpugut.

Qeqqata Kommunia isumassarsiffigaa

Eqqagassat suuneri aallaavigalugit immikkoortiterineq iluaqutissartaqartoq Allan Pertti Frandsen isumaqarpoq. Igalaamerngit qillertuusallu immikkoortittarnerisigut ikuallaavinni ikuallassinnaanngitsut sinnikut ikilisinneqarsinnaapput. Aammattaaq eqqagassat allat ikuallalluarneruneranik kinguneqarsinnaalluni. Iluaqutissat aappaattut eqqakkat atorluarneqarsinnaaneri taakkartorpaa.

- Qeqqata Kommuniani igalaamerngit aserortikkat asfaltiliornermi atorneqartarput. Assersuutigalugu Sisimiuni aqqusernit asfaltiusut ilaat igalaaminernik aserortikkanik akoqarput. Tassa imaappoq, igalaamerngit nammineq illoqarfigisami atorluarneqarsinnaapput, Allan Pertti Frandsen oqarpoq. Taassuma aamma oqaatigaa qillertuusat atoqqitassanngorlugit Danmarkimut nassiunneqarsinnaasut.

Eqqakkanit immikkoortiterisalernissamut siunnersuut piviusunngussappat tamanna aningaasartuutitaqassaaq. Allan Pertti Frandsenilu Qeqqata Kommunia ilaarneqarsinnaasoq isumaqarpoq.

2013-imi Qeqqata Kommunia igalaaminernut eqqaavissuarnik arfineq-pingasunik pisivoq, taamatuttaaq qillertuusanut aluminiuminullu eqqaavissuarnik arfineq-pingasunik aamma pisilluni. Taakkulu INI A/S akileeqatigalugu pisiarineqarput.

Allan Pertti Frandsenip siunnersuutigaa INI A/S aamma Iserit siunnersuutini piviusunngornissaanut aningaasaleqataanissaannik isumaqatigineqarsinnaasut. Siunnersuulli suli oqaluuserineqanngilaq taamaammallu inissiaatileqatigiiffiit pisortatigoortumik suli attavigineqarsimanatik.

 

A(S INI piumasaqaateqarniartoq

A/S INI-mi attaveqatigiinnermut pisortaq, Else Løvstrøm, KNR-imut oqarpoq siunnersuutip oqaluuserineqarnissaa utaqqimaaritsik. Ilisimatitsillunilu siunnersuut akuerineqassagaluarpat INI A/S-ilu aningaasaleqataassaguni taava piumasaqaateqarniarlutik.