Ice Cold Gold aavariartunut: Akornusersuivusi !

Amerikamiut aatsitassarsiortuusaarlutik nunatsinni filme-liaritittut Ice Cold Gold taakkua filme-liaritinnerat Kommuneqarfik Sermersuup innutaasunut nalunaarutigissallugu puigorsimavaa, Konrad Boye Siumup Inuusuttunut Suleqatigiiffiani siulittaasup tullia tusagassiutinut nalunaaruteqarluni aperivoq, qarasaasiakkut nutaarsiassaqartitsivik Qalorsaq taama allaaserisarpoq.
Allattoq Jaaku Lyberth, Jette Andersen
aggustip 24-at 2013 17:22

Konrad Boye aatani illooqanilu marluk ilagalugit kangerlummi Allumersami Qeqertarsuatsiaat Paamiullu akornanniittumi sapaatip akunerani kingullermi aavariarput.

Allumersami aavarfissaminnut apuukkamik paasivaat allanik inoqartoq. Kuup sinaani qaamasut takusatik siullermik iluliaanasorisimavaat, tikitartimmi sermip nakkaaviata eqqaaniimmat.

Qanillattornerani paasinarsiartorpoq takusaat iluliaanngitsut. Sunaaffa toqqit,  taassumalu eqqaani inuit  suliaqannguatsiartut.

Konrad Boye aavaqataasalu tuttu toqqit taakku inissisimaffiata kuup akianiittoq takoriaramikku  niuniarlutik  qanillattorpaat,  qanillilluguli  tulakkiartorneranni  VHF Radio kanal 8-kut aperineqarput  ’’suisi, filmiliorniartunut akornusersuivusi’’ aavariartut taama aperineqarput.    

Allumersat tuttunniarfiup nalaani aavariartarfiuvoq  aatsitassarsiortuusaartullu Ice Cold Gold  filme-liaritinneranni akornusersorneqannginnissaannik Kommuneqarfik Sermersuup innutaasunut nalunaaruteqarsimannginnera eqqumiippoq Siumup Inuusuttunut Suleqatigiiffiani siulittaasup tullia Konrad Boye  tusagassiutinut nalunaaruteqarluni taama allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq