IA Siumullu: Danmarkimi aningaasaqarnermut inatsit nunatsinnut iluaqutaassaaq
Aningaasaqarnermut ministerip, Nicolai Wammenip Danmarkimi aningaasanut aappagumut inatsit ullumi saqqummiummagu, nunarput sinnerlugu Folketingimi ilaasortat nuannaarput.
- Misigisimavugut ajungnitsorujussuarmik inerniliilluta aamma nuannaarutigaarput pitsaasumik isumaqatigiinninniarnerit ingerlassinnaagatsigit, Siumut sinnerlugu Folketingimut ilaasortaq Aki-Matilda Høegh-Dam KNR-imut oqarpoq.
AAMMA ATUARUK Aningaasanut inatsimmi: Kræftip suussusersinissaanut utaqqisarneq sivisuallaarpoq
Nunatsinnilu meeqqat ikiortariallit ikiorneqarnissaanut sulineq Inuit Ataqatigiit sinnerlugu Folketingimut ilaasortaq Aaja Chemnitz Larsenimut pingaarnerpaasimavoq.
00:00:18
- Ukiorpaalunngortuni sulissutigisamasarput, tassa Kalaallit Nunaanni meeqqat ikiortariallit ikiorneqarnissaat, aningaasanut inatsimmi pingaarnertut taarusuppara. Aningaasamut inatsit aqqutigalugu tamanna ikorfartorsinnaassavarput, Aaja Chemnitz Larsen KNR-imut oqarpoq.
Meeqqat pisinnaatitaaffitik pillugit ilisimasaqarnerulernissaat sulissutiginiarneqarmat ukiuni tulliuttuni sisamani tapiisoqarnera taassuma erseqqissarpaa.
Kalaallit Nunaat, Savalimmiut Danmarkilu pillugit piviusulersaarusiornissamut tapersiissutaasussat naalagaaffiup iluani agguarneqartussat 26,8 million koruuniusut Aaja Chemnitz Larsenip nuannaarutigilluinnarpai.
AAMMA ATUARUK Film.gl: Kalaallit Nunaat pillugu akiuunneq soorunami festivalimi itigartinneqarpoq
- Nunarput Savalimmiullu pillugit piviusulersaarusiortoqarsinnaanissaanut 26,8 million koruunit tappiissutaammata pingaaruteqarluinnarpoq. Corona ajornartoortitsigaluartoq Nunatsinneersuusugut Savalimmiormiullu ikioqatigiissinnaagatta immitsinnullu ikorfartorsinnaagatta nuannaarutigeqaara, Aaja Chemnitz Larsen oqarpoq.
00:00:39
Kalaallit Peqqissartut Illuat
Københavnimi Kalaallit Peqqissartut Illuanni kræftimik nappaatillit aalanerulernissaanik suliniummut misiliutaasumut aningaasaliisoqaqqinnera Aki-Matilda Høegh-Damimut pingaaruteqartuuvoq.
- Kalaallit Peqqissartut Illuannut, Danmarkimi peqqinnissaqarfimmut iluaqutaasussanik, aamma ukioq kingulleq aningaasaqarnermut inatsimmi isumannaarnikuusavut, aningaasaleeqqittoqassaaq. Anguniakkavut arlallit anguneqarput, Aki-Matilda Høegh-Dam oqarpoq
Danmarkimi meeqqat kalaallit arsaagaasarnerat pillugu Danmarkip inuunermi atukkanik ilisimatusarfiup misissueqqissaarisarfiata, tassa Det Nationale Forsknings- og Analysecenter for Velfærdrip misissussagaa Aki-Matilda Høegh-Damip ilanngullugu oqaatigaa.
