Film.gl: Kalaallit Nunaat pillugu akiuunneq soorunami festivalimi itigartinneqarpoq
Filmi piviusulersaarusiaq, Kalaallit Nunaat pillugu Akiuunneq, Imaginenative Filmfestivalimi takutinneqarusunnginnera, Film.gl-imi siulittaasup, Klaus Georg Hansenip, paasisinnaavaa. Filmimi piusulersaarut suliarilluagaangaluarpat suliarilluagaanngikaluarpalluunniit, festivali malittarisassanik malinnippoq.
Malittarisassanilu filmiliortup nammineq nunat inoqqaavinut ilaanissaa piumasaqaataavoq.
- Imagine Nativemi tunngviusumik piumasaqaataavoq, filmit takutinneqartut nunap inoqqaavinit filmiliarineqarsimanissaa.
Tassa nunat inoqqaavi pillugit filmiliaanani, nunap inoqqaavi filmilortuusussaapput, taanna oqarpoq.
Paasissutissat:
Film.gl tassaavoq, Kalaallit Nunaanni filmiliortartut kattuffiat.
Klaus Georg Hansen oqarpoq, suminngaanniilluunniit kingoqqisut kattuffimmi peqataasinnaasut, kiisalu avataaneersut Nunatsinnilu najugaqavissut aamma Kalaallit Nunaat pillugu filmiliornissaminnut tikilluaqqusaasut.
- Nunat inoqqaavisa filmiliaannik sammisaqarluni festivalimi Kenneth Sorentop peqataatinneqannginnini pillugu, Danmarkimi tusagassiuutitigut nalligeqqusaarnera ingasappallaaqaaq.
- Peqataanissamut piumasaqaatit taakkorpiaat, qularnanngitsumik ukiuni 20ni atuunnikuupput, Klaus Georg Hansen oqarpoq.
Kenneth Sorento Canadami itigartitaavoq
Filmiliortartup Kenneth Sorentop piviusulersaarutigalugu filmiliani, ”Kalaallit Nunaat pillugu Akiuunneq”, Canadami Imagine Native Filmfestivalimi nunanit tamaneersunut takutikkusukkaluaqaa.
Tamannali ajornakusooqaaq. Taassuma kalaallit ilitsersuisartut ingerlatsinermillu suliallit filmilioqatiginikuugaluarpai, tamannali iluaqutaanngilaq.
AAMMA ATUARUK Kalaallit Nunaat pillugu akiuuneq filmfestivalimi ilaassanngitsoq: Qaamasumik ameqarama, ilitsersuisoq isumaqarpoq
- Tapersiinissatsinnut piumasaqaatitsinni nutaani, festivalimi filmiliaminnik takutitsisinnaasut ilitsersuisuisa nunap inoqqaavinut ilaanissaat piumasaqaataavoq, Imagine Nativemi takutitassanik ataqatigiissaarisoq, Judith Kanatahawi Schuyler, nalunaarpoq, Jyllands-Posten naapertorlugu.
Kikkut tamarmik peqataasinnaapput
Filmiliornermi kina qullersatut akisussaasuunersoq apeqqutaavoq, Klaus Georg Hansen oqarpoq.
- Taamaakkaluartoq Kenneth Sorentop filmiliaata Kalaallit Nunaannut tunngasuunera iluarinarsinnaavoq. Kalaallit Nunaanni inuiannut tunngasuunani. Taanna nammineq filmiliornermi ingerlatsisutut ataatsimut isigalugu suut qanoq piareersarneqarnissaannut akisussaasuuvoq, tamannalu ImagineNativemit pingaartinneqarpoq.
Aka Hansen: Taamatut pisoqartarpoq
Uilu Stories-imi filmiliornermi ilitsersuisoq ingerlatsisorlu, Aka Hansen, oqarpoq, filmfestivalini itigartitaasarnini pillugu Kenneth Sorentop pakatsinera paasisinnaallugu. Kisiannili pissutsit taamaapput, taanna oqarpoq:
- Filmiliortartut itigartitaasarnerat nalinginnaasuuvoq. Uanga nammineq filmiliara, Polar, festivalimi takutinniarlugu qinnuteqarama ImaginaNativemit itigartinneqarnikuuvunga, Aka Hansen oqarpoq.
- Taassumali itigartitaanera pissusissamisoorpoq, festivalimi tassanerpiaq filmit nunat inoqqaavinit sananeqarsimasussaammata.
Festivalimik nassaassaqqaarpoq
Pipaluk Kreutzmann Jørgensen Nuuk International Film Festivalimi pisortaavoq. Taassumalu naatsorsuutigaa, Kenneth Sorentop filmiliaa festivalini allani inissaqartinneqarumaartoq.
- Nunarsuatsinni immaqa 700nik filmfestivaleqarpoq, taakualu akorngini ikittuaraannannguit nunat inoqqaavinit filmilianik peqataatitsisarlutik. Taamaakkaluartoq, allanik filmfestivaleqassaqqaarpoq, taassuma filmiliaatut ittunik takutitserusuttunik, taanna oqarpoq.
- Taanna festivalillu ikittuaqqat pillugit taamatut allaaserisaqartoqarnera ugguariinnarpara, festivalini ikittuaqqani nunap inoqqaavisa filmiliaannik sammisaqartoqartarmat. Taamatummi ittumik festivaleqarnera, uagut nuannaarutigiinnarparput.