IA-p Kielsenip ukiortaami oqalugiaataa isornartorsioraa: Siunissamut takorluukkanut tunngasunik imaqanngilaq
Ukioq nutaaq aallartippoq - Naalakkersuisullu siulittasuat ukiortaami pisarnertut oqalugiarpoq. Politikerillu ukiortaami oqalugiaatinut qisuariartarput, Demokraatillu aammalumi Partii Naleraq isornartorsiuisorujussuupput.
IA-lumi - illuatungiliuttunilu partiini annersaasoq - unnersiutiginninngitsorujussuuvoq. IA-mimi siulittaasup, Muté Borup Egedep, ukiortaami oqalugiaataa nunatsinni siunissamut anguniakkanut tunngasunik imaqangaarsorinngilaa.
AAMMA ATUARUK Video: Kim Kielsenip ukiortaami oqalugiaataa tamakkiisoq
- Siunissaq qanoruna ittoq ornikkipput? Siunissaq qanoruna ittoq ataatsimoorluta sulissutiginiaripput suleqatigiiffiginiarippullu, Muté Borup Egede aperaaq.
- Innuttaasut ulluinnarni atugaat pitsanngorsassagaanni qanoruna ittunik siunnerfeqartariaqartugut? Inuiaqatigiit siunissamut takorluugaqalersillugillu neriuummik tunineqarnissaat amigaatigaarput.
Akitsuutinik qaffaanernut tunngasunik oqaaseqaavinngitsoq
Kim Kielsenip ukiortaami oqalugiaataa assigiinngitsorpassuarnut tunngavoq: Ilaatigut Tasiilami inuuniarnikkut ajornartorsiutit, nunatsinnut aningaasaliinissaminnut soqutiginnittut amerliartuinnartut, inuussutissartiutit suliffiillu allat pilersinneqarsinnaasut amerikamiullu soqutiginninnerat.
- Nunatsinni qanoq iliuutsit tamarmik nunatsinnut inuinullu iluaqutissanngortinneqartassapput, Kim Kielsen oqarpoq.
Mittarfissualiornissat 2019-imi oqallisaasorujussuit pillugit aamma oqaaseqarpoq, 3,6 milliardit koruuningajannillu nalilinnik mittarfissualiornissat Nuummi mittarfiup allilerneqarnissaanut qaartiterinikkut aallartisarneqarput.
AAMMA ATUARUK Nivi Olsen: Imminut qiviarsinnaaneq ilinniartariaqarparput
Ilulissani Qaqortumilu mittarfissualiornissat ukioq manna aamma aallartisarneqassapput. Taakkuinnaanngillalli. Illoqarfinnimi mikinerni mittarfiliornissanut pilersaarusiornerit 2020-p ingerlanerani aallartinneqassasut, Kim Kielsenip ukiortaami oqalugiarnermini oqaluttuaraa.
Innuttaasorpassuilli Inatsisartut ataatsimiittarfiata silataani novemnbarimi marloriarlutik akerliussutsimik takutitsinerannik kinguneqartumik sukkunut, imigassanut tupanullu akitsuutinik ullormiit ullormut qaffaanernut tunngasunik oqaaseqanngilaq.
Qanoruna pitsaasumik alloriarniartugut?
Muté Borup Egedelu mamiatsappoq:
- Ukiormi qaangiuttoq innuttaasut annertoorujussuarmik kaasarfimminninngaanniit akitsuutitigullu assigiinngitsutigullu aallerfigineqaqattaarput. Qanoruna pitsaasumik alloriarniartugut taava? Innuttaasut ulluinnarni atugaat pitsaanerulersinniarlugit.
Partii Naleqqameersullu isumaqataapput:
- Oqalugiaataata imaanut soorunami pakatsilaarpugut. Pingaarnertut tunngavilersuutai Inatsisartut aalajangiiffigisimasaannut tunngasunik annerusumik imaqarpoq, siunissamulli takorluukkanut tunngasunik imaqarani. Innuttaasut ulluinnarni atugaasa pigsanngorsaanissamut qanorlu alloriarnissamut tunngasunik oqaaseqanngilaq, Partii Naleqqap Inatsisartuni ilaasortaatitaa, Pele Broberg, oqarpoq.
Naalakkersuisullu partii tapersersortaat, Demokraatit, soorlu imminut qiviarsinnaanermut - Demokraatit siulittaasuata Nivi Olsenip isumaa naapertorlugu kalaallit inuiaqatigiiusut ilinniartariaqakkatsinnut - tunngasumik oqaaseqannginnginnera naammagittaalliutigaat.
