Nivi Olsen: Imminut qiviarsinnaaneq ilinniartariaqarparput
Kingumut Naalakkersuisut siulittaasuat ukiortaami oqalugiarpoq.
Oqalugiaat Demokraatinit isumaqatigilluarneqarpoq, taamaakkaluartorli innuttaasut ajornartorsiortillugit imminnut qiviarusuttannginnerat siulittaasup oqalugiarnermini ersarinnerusumik eqqartorsinaagaluaraa Nivi Olsen isumaqarpoq.
- Inuiaqatigiittut eqqarsartaaserput, soorlu meeqqat sumiginnakkat eqqartorneqarput. Isumaqarpunga ajornanngippallaartoq, pikkoriffigivallaalersimasarpullu tassaasoq ajornartorsiuteqaraangatta politikkerinut tikkuartuineq. Taakkuuku pillugit meeqqat sumiginnagaasut, immaqaluunniit systemerput pillugu taamatut inissisimavugut. Kisianni meeqqanik pinngortitsisut kikkuuppat? Tassaapput angajoqqaat, isumaqarpunga sunaluunniit ajornartorsiut pineqartillugu immitsinnut qiviarsinnaasariaqartugut, Nivi Olsen oqarpoq.
Ukioq nutaaq immikkuullarissoq
Kim Kielsenip ukiortaami oqalugiaataani politikkikut anguniagarineqartut aatsaat taama ersaritsigalutillu sapiisernerusu Demokraatit siulittaasuat isumaqarpoq.
Meeqqat sumiginnagaasut pillugit ukioq manna ukkatarineqangaatsiarnerat Kim Kielsenip ilaatigut oqalugiaammini eqqaavai.
Pifffisami sivitsortumi inuiaqatigiinni oqallisaalluartut tassalu mittarfissualiornissat Naalakkersuisut siulittaasuata oqalugiarnermini eqqaavai, soorlu Nuummi mittarfiup tallilerneqarnissaanut 3,6 millionit koruuninik nalilik sanaartorneqarluni aallartinneqartoq aamma eqqaavaa.
Ilulissani Nuummilu mittarfissualiornissat ukioq manna sanaartorlugit aallartinneqassapput.
Mittarfiliortiternissalli taakkuinnaanngitsut Kim Kielsenip oqalugiaammini oqaatigaa. Illoqarfinnimi mikinerusuni arfineq pingasuni ukiup ingerlanerani mittarfiliortoqarnissaa taassuma oqaatigaa.
Tamanna Demokraatinit nuannaarutigineqarpoq.
- Takornariaqarneq inerisassappat, Nuummi Ilulissanilu mittarfissuassat angisoorsuit kisimi isumalluutigineqarnissat naammanngillat. Taamaattumik iluaqutiginerussagutsigut illoqarfiit mikinerit aamma naannerusunik mittarfiliorfigineqarnissaat pingaarteqarpoq. Taamaatumik Kim Kielsenip oqalugiaataa tassuuna isumaqatigilluinnarpara. 2020-milu pisussat qilanaaraakka, Nivi Olsen oqarpoq.
Akitsuutit eqqaaneqanngitsut
Inuiaqatigiinnit akerlerineqangaatsiarnikut akitsuutit uani Naalakkersuisut siulittaasuanit oqalugiarnermini ataasinnguamilluunniit eqqaaneqannginnerat immikkut maluginiagassaavoq.
Tamannalu akuersaarneqarsinnaanngitsoq Inatsisartuni ilaasortaq, Partii Naleqqameersoq Pele Broberg isumaqarpoq.
- Pissakinnerit pissakinneruleraluttuinnarnerat, pissaqarnerillu pissaqarneruleraluttuinnarnerat sammineqannginnerat amigaatigisorujussuuara, tassami akitsuutit qiviaraanni kikkunnut tamanut eqquisussat. Kisiannili akileraarutinut neriorsuutit ukioq manna atuutilertussaanngitsut, soorlu ukioq manna atuutilertussatut neriorsuutigalugit oqariartuutigisai. Innuttaasunut tigussaanerusumik anguniagaqannginnera uanga amigaatigaara, Pele Broberg oqarpoq.
