Video: Kim Kielsenip ukiortaami oqalugiaataa tamakkiisoq
Naalakkersuisut siulittaasuat arfinilissaanik ukiortaami ippassaq oqalugiarpoq.
Ippassaq knr.gl-imi allaaserineqareersutut Kim Kielsenip oqarnera naapertorlugu nunatta soqutigineqarneruleraluttuinnarnera tamatsinnut iluaqutaassaaq.
- Naqissusissuara, nunarsuarmioqataanitsinni inissisimanerput, siunissarpullu nunatta inuinit kisimi aalajangerneqartassammat, taama amerikamiut præsidentiata nunatsinnik pisiarinnikkumanerminik 2019-ip ukiaanerani neqerooruteqarnera innersuussutigalugu oqarpoq.
- Qilanaarutigaarali amerikarmiut naalakkersuisuinik suliffeqarfissuinillu suleqateqarnitta annertuninngornissaa.
- Avataaniit taamannak annertuumik aningaasalersuinissamik soqutiginninnerup nunatsinni innuttaasunut, avatagiisitsinnut, silap pissusiata allanngoriartorneranut, nunattalu aaqqissugaanikkut ineriartorneranut iluaqutissanngortinneqartassaaq, Kim Kielsen ilaatigut taama oqarpoq.
AAMMA ATUARUK Kielsenip inuusuttut ukiortaami oqalugiarnermini kaammattorpai: Sapinngilasi!
KNR TV-mit aallakaatitap aallartinnerani allagartalersuilluni aallakaatitassamut ilisarititsineq amigaataasoq aallakaatittoorpaa. Aamma oqalugiareernerata kingorna tussiut atorneqartartoq 'Aarlorfigissavat' amigaataavoq.
Oqalugiarnerali eqqortoq tamarmi aallakaatinneqarpoq.
Oqalugiarnissaanullu aallakaatitassatut piareersagaq allagartalersuilluni ilisarititsinertaqarlunilu tussiummik ukiortaarsiummik naggasiinertalik nalunaaqutaq 22.00 aallakaatitseqqinnermi takutinneqarpoq.
Kim Kielsenip ukiortaami oqalugiaataa uani aamma atuarsinnaavat.