IA-p aalajangersimanerusumik tunaartaqarnissaq ujartorpaa
Naalakkersuisut aningaasanut inatsisissatut siunnersuutissaata siullermeerneqarnerani Inuit Ataqatigiit aningaasaqarneq pillugu oqaaseqartartuat Naaja Nathanielsen taama oqarpoq.
Ernumallutik isiginnittuuffigigitsik
Erseqqissarpaalu aningaasanut inatsisissamut siunnersuutaasumut tunngatillugu Inuit Ataqatigiit suut takorluugaanersut tusassallugit amigaatigimmatigit. Soorlu qanoq ililluni ukiuni aggersuni amigartooruteqartarnissat siunissamik qaamanerusumik eqqanaarinnissinnaanersut. Ilanngullugu erseqqissarpaa illuatungiliuttut parteerujussuanni ernumallutik isiginnittuuffigigitsik, naalakkersuisoqatigiit namminneq aningaasanut inatsisissatut siunnersuutertik saassutarimmassuk.
Aamma atuaruk Amigartooruteqaannarnissaq mianersoqqussutigigaat
Naaja Nathanielsenip aamma erseqqissarpaa, Kalaallit Nunaanni aningaasaqarnermut siunnersuisoqatigiit siunnersuutaat tassa inuiaqatigiinni allannguerujussuarnissaq Inuit Ataqatigiit isumaqatigimmassuk. Tamannali toqqissimassutigineqanngitsoq ilanngullugu oqarpoq.
- Suuteqarnerluta ilisimavarput, sunilli pissarsissanerluta ilisimanagu. Taamaattumik aaqqissuusseqqinnissat suli aallartinneqarsimanngitsut, taanna oqarpoq.
Akitsuusersuinissaq aaqqiissutissatut isiginngilaat
Taarsillugu IA akitsuusersuinissanut ilaatigut isumaqataapput. Akitsuusersugassatulli siunnersuutigineqartut itigartissimassagaluaritik Nathanielsen oqarpoq. Akitsuusersuinissalli aaqqiissutissatut isiginngikkitik ilanngullugu oqarluni.
- Qarlinnut quinermut assersuunneqarsinnaapput, ajornartorsiutinik aaqqiinerunatik, Nathanielsen KNR-imut oqarpoq, erseqqissaqqillugulu annertuumik aaqqissuusseqqinnerit tassaammata suliarineqartussat.
Aamma atuaruk Naaja Nathanielsen: Ajornartorsiutip qitera saassuttariaqarparput
Aammattaaq takornariaqarneq Inuit Ataqatigiit oqaaseqarneranni annertuumik sammineqarpoq, Naaja Nathanielsenillu tupigusuutigaa Nunatsinni takornariaqarnermut Siunnersuisoqatigiit Visit Greenlandip aningaasatigut ikilileriffigineqarnera, naak Inatsiartut taamaaliornissamut siusinnerusukkut akerlilersuisimagaluartut.
- Paasisinnaanngilarput qanoq ilillutik naalakkersuisoqatigiit qisuariaateqaratik tamatumunnga akuersaaginnaarsinnaanersut, Nathanielsen oqarpoq.
Aamma atuaruk IA: Takornarissat tikittartut marloriaatinngortikkusuppagut