Aqqaluaq B. Egede, Sara Olsvig aamma Juliane Henningsen, Inuit Ataqatigiit

IA: Takornarissat tikittartut marloriaatinngortikkusuppagut

Inuit Ataqatigiit ukiut qulit iluanni takornariat nunatsinnut tikittartut marloriaatinngortinniarpaat. Ullumi Tusagassiortunik katersortitsinermi ilaatigut taamak oqariartuuteqarput.

- Takornariaqarnermik ineriartortitserusuttut, inuussutissarsiornikkut namminersortut namminersulerusuttullu periarfissaginnerulertillugit ingerlatsisoqartariaqarpoq. Tassani aporfissaararpassuit inatsisitigut eqaallisarusuppagut aporfissaaqqat peerlugit.

- Namminersortut qiviaqqineqartariaqarput, taakku periarfissagissaarunik suliffissanik aamma pilersitsisussaammata, Inuit Ataqatigiit siulittaasuat Sara Olsvig, radioaviisimut taama oqarpoq.

 

Taassuma upperaa takornarissat tikittartut marloriaatinngortinnissaannut innuttaasut sinerissameersut suleqataarusuttut.

 

- Takornariaqartitsineq ukiup ingerlanerani qaammatini aaliangersimasuni eqiteruttarpoq, tassanilu anguniagaraarput ukioq tamaat atorluarlugu takornariaqartitsineq ingerlanneqassasoq.

- Takornarissat suut misigerusunneraat, ornikkusunneraat takorusunneraallu misissugassaavoq. Kisianni upperilluinnarparput inoqarfinni, tassa nunaqarfinni illoqarfinnilu suleqataarusuttoqartoq, Sara Olsvig oqarpoq.

 

Inuit Ataqatigiit ukiuni qulini takornariaqarnerup marloriaatinngortinnissanik siunniussaqarneri piviusorsiortuunersoq Visit Greenlandimut paasiniarparput.

 

Inuit Ataqatigiit siunniussaat kusanaraluaqisoq takornariaqarnerup iluani aningaasat kaaviaartut marloriaatinngussappata aqqutissaanngitsoq Visit Greenlandimi pisortaq isumaqarpoq.

 

- Ukiut qulit iluanni aningaasat takornariaqarnerup iluani kaaviiaartitat marloriaatinngortitsinissai piviusorsiortuuvoq. Anguniagassaasariaqarpoq takornarissat Nunatsinni aningaasanik atuinerunissaat, tassa takornarissat neqeroorutitsinnik piserusuttut ujartornisai.

- Oqarutta takornarissat tikittartut 100.000-iuppata aningaasallu kaaviiaartut marloriaatinngorlutik, imaluunniit 70.000-it tikippata kaaviiaartitallu marloriaatinngorlutik, taava 70.000-it toqqassavagut, Anders Stenbakke Visit Greenlandimi pisortaq Radioaviisimut taama oqarpoq.

 

Inuit Ataqatigiit ukioq naallugu takornarissat tikittalernissaannik suliniuteqarniarnerat pitsaasutut aningaasarpassuarnillu akeqartariaqanngitsutut Anders Stenbakkep nalilerpaa. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat