Siulittaasoq nutaaq: IA-mit ilisimaneqarluartoq oqallisiginneqataasoq

Nunatsinni partiit annersaasa tullianni Inuit Ataqatigiinni siulittaasussarsiortoqarnissaanut sapaatip-akunnerit pingasut qaangilaaraallu, siulittaasussatut suli sassartoqanngilaq.

Sanngiillisimanermulli ersiutaanngitsoq, Inuit Ataqatigiit Folketingimut ilaasortaatitaat oqaatigaa:

- Taamaattoqarneranik ersiutaanngilaq. Partiimi pingaartillugit suliniutiginiakkatta ilaat saqqummiutereerpavut, Aaja Chemnitz Larsen oqarpoq.

Partiimi siulittaasunngortussap inuiaqatigiinni ataatsimuulersitsisinnaasariaqarlunilu aqqutissamik tikkuussisinnaasariaqartoq, Kommuneqarfik Sermersuup borgmesteria Asii Chemnitz Narup, Kommune Qeqertalillu borgmesteria Ane Hansen peqatigalugu Inuit Ataqatigiit siulittaasussaat pillugu tusagassiuutinut taama allaaserisaqarput.

AAMMA ATUARUK Politikeri nuannarineqarluartoq inuulluaqqusivoq

- Tamatigoortuunissap pingaaruteqassusaa takutinniarsaraara, Inuit Ataqatiginnilu tamanna ilaatigut anguniagaraarput, Inuit Ataqatigiinnilu pingaartitatta siulittaasussamit aamma pingaartitarineqarnissaat neriuutigaara, siulittaasutullu sassarumaartussap tamanna sulissutigisinnaassaneraa pissanganassaaq, Aaja Chemnitz Larsen oqarpoq.

Inuit Ataqatigiit Nuummi immikkut ittumik sapaatip-akunneri pingasut qaangiuppata ataatsimeersuassapput, siulittasussamillu suli tassa sassartoqanngilaq.

Naak Aaja Chemnitz Larsen siulittaasussarsiornissaq pillugu oqallinnermut peqataagaluarluni siulittaasutut nammineq sassarniarnerluni oqaatigiumanngilaa:

AAMMA ATUARUK Sara Olsvig Inuit Ataqatigiit siulittaasuattut tunuartoq

- Tassunga atatillugu oqaaseqarusunngilanga. Qanoq pisoqassanersoq partiitta iluani oqallisigissavarput. Uangalu sassarniarnersunga sassarniannginnersungaluunniit oqaluuserissallugu pingaartinngilara, Aaja Chemnitz Larsen oqarpoq.

Inuit Ataqatigiit immikkut ittumik ataatsimeersuarnissaat Nuummi arfininngornermi decembarip aallaqqaataani pisussatut pilersaarutigineqarpoq.