IA-mi ilaasortaq Inatsisartunit tunuarluni imarpik pillugu suliniaqatigiiffimmi sulililersoq
Inuit Ataqatigiinnit Inatsisartunut ilaasortaq, Sofia Geisler politikeritut tunuarpoq. Taanna suliniaqatigiiffimmi siunnersortitut atorfinissaaq.
Taanna Facebookimi quppernermini allappoq.
- Periarfissamik tunineqarpunga qaangiinnarsinnaasimanngisannik. Periarfisamik taamaattumik ullut tamaasa tunineqarnaviannginnama aalajangerniarneq imaannaasimanngilaq.
- Sivisuumik eqqarsaatigivara, nalilersuillungalu. Eqqarsaatigilluareerlugulu aalajangerpunga 15. februar 2022 atuutilersumik Inatsisartuni qinikkatut atuuffeqarninniit tunuassallunga, tamatumalu kingorna “Ocean North Kalaallit Nunaat”-ni siunnersortitut sulilissallunga.
Ocean North Kalaallit Nunaat suliniaqatigiiffiuvoq naalagaaffimmut pituttorsimanngitsumik imarpimmik illersuiniarnermik suliaqartoq.
Sofia Geisler Inatsisartunut 2018-imi qinigaavoq, taannalu siorna qinigaaqqilluni. Tamatuma kingorna kultureqarnermut, ilinniartitaanermut, ilisimatusarnermut ilageeqarnermullu ataatsimiititaliami siulittaasuuvoq.
Ocean North suua? Oceans North suliniaqatigiiffiuvoq naalagaaffimmut atassuteqanngitsoq (NGO), suliniaqatigiiffiup imaani illersuineq soorlu imaanit isumalluutinik nunap inoqqaavisa innnuttaasullu suleqatigineratigut atorluaaneq siuarsaaniarfigaa
IA-meersoq tulliuttoq
Kialli Geisler Inatsisartuni paarlassaneraa suli ilisimaneqanngilaq, parteeqataali Mariia Simonsen sinniisussatut siullertut inissisimavoq.
Mariia Simonsenimi Eqaluk Høeghip aamma Inuit Ataqatigiinnut ilaasortap sulinngiffeqarnerani nunatsinni politikkikkut suliaqarpoq.
Eqaluk Høegh uippakajaarnini pissutigalugu meeqqanut inuussuttunullu naalakkersuisutut aasaq sulinngiffeqalerpoq, taannali sulinissaminut piareeqqilluni nalunaarnikuuvoq.
AAMMA ATUARUK Nikisiterineq, sulinngiffeqarneq pisoqarfiuneralu: Inatsisartuni kikkut issianersut nalunngiliuk?
Sofia Geislerip Inuit Ataqatigiit partiillu allat imminullu taaguussinikut qujassuteqarfigai.
- Neriuppungalu naammassisakka ilissinnut iluaqutinngorlutik atuutilerumaartut, Sofia Geisler Facebookikkut allappoq, nangillunilu:
- Soorunami Inuit Ataqatigiit gruppeat tamanik ajunnginnerpaanik iluatsitsilluarnissaannillu kissaappara aammalu partiit allat ataatsimiititaliat aqqutigalugit suleqatigilluarsimasakka qujaffigivakka.
Inatsisartut siulittaasoqarfiata Inatsisartut sinnerlugit Sofia Geislerip tunuarnera pisortatigoortumik akuereqqaartussaavaa, tamannali ataatsimiinnerup tulliata aallartinnerani aatsaat pisinnaavoq, tassa upernaamut ataatsimiinneq marsimi aallartippat sinniisussamik atuutsitsilersoqarsinnaavoq.
Sofie Geislerip politikerinit tunuarnera Inuit Ataqatigiit Inatsisartuni gruppianni siulittaasup, Agathe Fontainip uggoraa:
- Neqeroorfigitissimanermini naagaasinnaanngisaminut taanna tusaatissatut tigusariaqarparput, Inuit Ataqatigiit gruppiani Inatsisartuni siulittaasutut uggorivara Sofia Geislerip tunuarnera, sullarissuuvoq aamma suliaminut pitsaassusilimmik qaffasissumillu suliaqartarnera tamatta ilisimavarput, taamaammat soorunami uggorivarput, allatulli ajornaqaaq nammineq toqqagarimmagu, Agathe Fontain oqarpoq.